Турнір для дзяцей і падлеткаў, але ўсё па-даросламу: Магілёў прыняў тэставыя спаборніцтвы па каратэ

У гэтыя выхадныя спартыўны комплекс «Алімпіец» у Магілёве прыняў тэставыя спаборніцтвы па каратэ да II Гульняў краін СНД. Лагістыку і арганізацыйныя пытанні адпрацавалі падчас рэспубліканскіх спаборніцтваў Mogilev Open, удзельнікамі якіх сталі спартсмены ад 8 да 15 гадоў з розных куткоў нашай краіны. Дзеці не змогуць стаць удзельнікамі маючых адбыцца міжнародных спаборніцтваў, таму што ў Нацыянальную зборную патрапяць старэйшыя спартсмены. Аднак менавіта гэты чэмпіянат стаў генеральнай рэпетыцыяй маючых адбыцца II Гульняў краін СНД.

Выпрабаваць свае сілы і пазмагацца за высокія ўзнагароды ў Магілёў прыехалі каля 200 спартсменаў. У якасці балельшчыкаў і груп падтрымкі - бацькі. Рабяты акунуліся ў атмасферу буйнога міжнароднага чэмпіянату, бо разам з імі сёння адпрацоўваюць схемы дзеянняў арганізатары, суддзі і валанцёры. Да II Гульняў краін СНД застаецца ўсё менш часу, а гэта значыць, што прыйшоў час адшліфаваць усе шурпатасці.

«Гэта генеральная рэпетыцыя да ІІ Гульняў краін СНД, якія ў тым ліку пройдуць у Магілёве. Тут будуць праходзіць спаборніцтвы па каратэ. Працавалі напружана, карэкціравалі ўсе моманты да дробязяў, каб спартсменам было максімальна камфортна, зручна выступаць, каб яны паказалі найвышэйшыя вынікі, а гледачы засталіся задаволеныя і карцінкай, і ўражальнымі баямі. І ўвогуле, самім горадам Магілёвам, які вельмі гасцінна прыме іх», - падзяліўся галоўны суддзя спаборніцтваў Аляксандр Краевіч.

Тэставыя спаборніцтвы - гэта не першая рэпетыцыя да маючага адбыцца міжнароднага турніру. «Да гэтага тут праводзілі Чэмпіянат Рэспублікі сярод дарослых, там мы адпрацавалі судзейскую сістэму, самі правілы спаборніцтваў, як працаваць з дарослымі. Сёння наша задача на гэтым турніры, апроч таго, каб правесці самі спаборніцтвы, - праверыць, як працуюць усе службы: арганізатары, валанцёры, ахова, кафэ і грамадскае харчаванне», - адзначыў галоўны суддзя.

Ёсць пэўныя плюсы і ў тым, што тэставыя спаборніцтвы праходзяць ужо другі раз. «Сама сістэма хронаметражу і судзейства была адпрацаваная крыху раней. Мы разумеем, як працуе аб'ект, адміністрацыя, супрацоўнікі, гатэль. Ужо ўсё адпрацавана. Гэтыя моманты зачыненыя. Засталіся маленькія нюансы: хто куды ідзе, хто дзе стаіць, як можна перамяшчацца - гэта пытанні лагістыкі, якія засталося дапрацаваць», - адзначыў Аляксандр Краевіч.

Да гэтых тэставых спаборніцтваў крыху змяніўся і сам спартыўны комплекс, і зала, якая прымае спаборніцтвы. Абноўлены сядзенні на трыбунах і табло. «Новая LED-панэль ужо працуе на гэтых спаборніцтвах у тэставым рэжыме. Праводзіцца закупка і, я спадзяюся, у канцы чэрвеня будуць набыты 40 пагонных метраў LED-панэляў, якія будуць фармаваць борт, дзе на буйных спаборніцтвах звычайна рэклама бегае. Але нашы панэлі - шматфункцыянальныя, яны збіраюцца ў два вялікіх экрана. Гэтыя панэлі будуць працаваць на II Гульнях краін СНД, а потым мы будзем іх выкарыстоўваць і на іншых спаборніцтвах, - расказаў дырэктар абласнога цэнтра алімпійскага рэзерву па лёгкай атлетыцы і гульнявых відах спорту Дзмітрый Чыгір. - Акрамя гэтага, у нас ідзе замена вокнаў - велізарных вітражоў. Гэта складаная праца. Закуплены сучасныя шафкі ў раздзявальні. Пасля заканчэння аздараўленчай кампаніі, у канцы чэрвеня, правядзём бягучы рамонт раздзявалак, фае, пафарбуем сцены. Цяпер гэта няпроста рабіць, у нас аздараўляюцца 130 дзяцей, трэба выконваць бяспеку».

На гэтым сюрпрызы для ўдзельнікаў Гульняў не скончацца. Сюды дададуць мастацкае святло, а самі баі будуць праходзіць на памосце. А адкрыццё, абяцаюць арганізатары, будзе яскравым і захапляльным.

Адпрацоўваюць у Магілёве і працу валанцёраў. Адной з іх стала студэнтка гісторыка-філалагічнага факультэта МДУ ім. А.А.Куляшова Крысціна Садоўнікава. Для дзяўчыны гэта не першае буйное мерапрыемства, дзе яна валанцёрыць. «З такіх маштабных мерапрыемстваў я была валанцёрам на беларуска-расейскім праекце «Цягнік Перамогі». Гэта круты і цікавы досвед. Актыўна займаюся валанцёрскай дзейнасцю на сваім факультэце. У студзені я даведалася, што ў нас будуць праводзіць спаборніцтвы ў рамках ІІ Гульняў краін СНД, сама стала шукаць інфармацыю, знайшла і запоўніла анкету валанцёра. А пазней нам ва ўніверсітэце сталі прапаноўваць тут папрацаваць - я, атрымалася, апярэдзіла падзеі, - усміхаецца дзяўчына. - Валанцёрам тут усё дакладна і ясна растлумачылі, расказалі і паказалі, што як трэба рабіць, растлумачылі кожнаму яго зону адказнасці. Тым больш, гэта ўжо другая наша рэпетыцыя. Я, напрыклад, буду сустракаць гасцей і гледачоў, дапамагаць арыентавацца ў спарткомплексе. Мы гатовы прымаць такія высокія міжнародныя спаборніцтвы. Гэта будзе цікавы досвед, магчымасць пагутарыць з людзьмі, замежнымі гасцямі. Мне здаецца, што будзе крута. Гэта будзе максімальна маштабнае спартыўнае мерапрыемства для нашага горада. Як тут убаку застацца і не паўдзельнічаць?».

У высокім узроўні арганізацыі сённяшніх спаборніцтваў упэўніліся і бацькі будучых спартсменаў. Алеся Мішковіч з Магілёва прыйшла на спаборніцтвы разам з сынам Савеліем. Сёння хлопчык стаў пераможцам у катэгорыі 10-11 гадоў, ката, хлопчыкі. Спортам яе сын займаецца дастаткова даўно, ён бываў на спаборніцтвах рознага ўзроўню. «Узровень арганізацыі спаборніцтваў у Магілёве сёння - самы высокі. Для бацькоў і нашых хлопцаў гэта вельмі важна, каб усё было дакладна, каб дзеці лішні раз не перажывалі перад выхадам на татамі, а бацькі не нерваваліся, што нешта раптам пойдзе не так, - адзначыла яна. - У нас праходзяць трэніроўкі часам у гэтай зале. І прыемна адзначыць, што ён таксама змяніўся да Гульняў. Навакольныя прастора таксама немалаважна як для спартсменаў, так і заўзятараў».

Павітаць юных удзельнікаў рэспубліканскіх спаборніцтваў і паглядзець на ход падрыхтоўкі да ІІ Гульняў краін СНД прыехаў міністр антыманапольнага рэгулявання і гандлю, старшыня Беларускай федэрацыі каратэ Аляксей Багданаў. «Генеральную рэпетыцыю з дзецьмі мы праводзім не проста так. Старэйшыя спартсмены стануць непасрэднымі ўдзельнікамі Гульняў. І каб не парушаць цыкл іх падрыхтоўкі, не траўміраваць іх, было прынята рашэнне адпрацаваць нюансы на спаборніцтвах са спартсменамі больш малодшага ўзросту. Тым больш са старэйшымі прадстаўнікамі гэтага віду спорту мы ўжо папрацавалі на першых тэставых спаборніцтвах, якія праходзілі ў Магілёве вясной, - расказаў ён. - Сёння тут адпрацоўваюцца ўзаемасувязі суддзяў, тэхнічнага персанала, валанцёраў, МНС, міліцыі - усіх службаў, якія будуць задзейнічаныя ў жніўні».

А акрамя гэтага, адзначыў Аляксей Багданаў, сённяшняя рэпетыцыя - гэта яшчэ адзін стымул для развіцця будучых сусветных чэмпіёнаў, якія сёння змагаліся за званне найлепшых. «Высокі ўзровень арганізацыі спаборніцтваў - гэта яшчэ і сур'ёзны стымул для нашых маленькіх спартсменаў. Яны бачаць, як праходзяць міжнародныя старты, уражваюцца, у іх з'яўляецца жаданне яшчэ больш развівацца, яшчэ больш працаваць, каб у будучыні, стоячы на першым месцы на пастаменце, ганарліва прадстаўляць краіну на сусветным узроўні», - сказаў ён.

Старшыня Беларускай федэрацыі каратэ адзначыў, што спаборніцтвы ў магілёўскім «Алімпійцы» стануць вялікім спартыўным святам. «Магу з упэўненасцю сказаць, што мы гатовыя на годным узроўні прымаць спаборніцтвы па каратэ. На сённяшні дзень усе краіны СНД пацвердзілі свой удзел. Акрамя таго, мы чакаем гасцей і з іншых дзяржаў. Мы чакаем дэлегацыі з Кітая, іншых азіяцкіх рэгіёнаў, а таксама - з Блізкага Усходу», - распавёў ён.

Лагістыка вывастраная, механізмы адпрацаваны. Засталася справа за малым - дачакацца пачатку ІІ Гульняў краін СНД. Арганізатары абяцаюць - будзе цікава, ярка і відовішчна.

 БЕЛТА