Турнір на прызы Сяргея Гарлуковіча збярэ ў Магілёве юных футбалістаў з Беларусі і Расіі

Турнір па футболе сярод юнакоў 2009 года нараджэння на прызы алімпійскага чэмпіёна Сяргея Гарлуковіча пройдзе ў Магілёве з 19 па 21 кастрычніка, паведамілі ў Магілёўскім гарвыканкаме.

«Турнір стане для юных футбалістаў добрай спаборніцкай практыкай і сыграе важную ролю ў развіцці і папулярызацыі юнацкага футбола ў краіне, – адзначылі суразмоўцы. – Акрамя таго, мерапрыемства будзе садзейнічаць умацаванню сяброўскіх спартыўных сувязяў паміж футбольнымі клубамі Беларусі і Расіі».

У спаборніцтвах прыме ўдзел 8 каманд: ФК «Днепр-Магілёў», ФК «Дынама-Брэст» (г. Брэст), ФК «Нёман» (г. Гродна), ФК «Мінск» (г. Мінск), «Днепр-Магілёў-2», ФК «Віцебск» (г. Віцебск), «ГГ СДЮШАР № 8» (Гомель), «Руская Еўропа» (Расійская Федэрацыя, Калінінградская вобласць).

Урачыстае адкрыццё турніру адбудзецца 19 кастрычніка ў футбольным манежы. Павіншаваць юных футбалістаў з адкрыццём турніру прыедзе алімпійскі чэмпіён Сяргей Гарлуковіч і заслужаны трэнер БССР, першы трэнер алімпійскага чэмпіянату Іван Туркоў.

Спаборніцтвы працягнуцца да 21 кастрычніка. Найлепшыя каманды будуць узнагароджаны кубкамі і памятнымі падарункамі.

Сяргей Гарлуковіч нарадзіўся 18 лістапада 1961 года ў вёсцы Баруны Ашмянскага раёна Гродзенскай вобласці. Выхаванец Магілёўскай СДЮШАР № 7 па футболе ў 1988 годзе стаў чэмпіёнам ХХIV Алімпійскіх гульняў у Сеуле ў складзе каманды СССР. Чатырохразовы чэмпіён Расіі (1995–1998 гадоў) у складзе каманд «Спартак-Аланія» (Уладзікаўказ), «Спартак» (Масква). Віцэ-чэмпіён Германіі (1992) у складзе каманды «Барусія» (Дортмунд). Заслужаны майстар спорту. Кавалер ордэна «Знак Пашаны».

Рэд.