Турнір па водным пола збярэ ў Магілёве 160 удзельнікаў з Беларусі і Расіі

Адкрыты міжнародны турнір па водным пола збярэ ў Магілёве 160 удзельнікаў з Беларусі і Расіі. Спаборніцтвы на прызы спартсмена Ігара Бычкова пройдуць у абласным цэнтры ўжо чацвёртым разам.

За кубкі і медалі турніру будуць змагацца 8 каманд – юнакі ва ўзросце да 12 гадоў. Мерапрыемства пройдзе з 28 верасня па 1 кастрычніка ў басейне фізкультурна-аздараўленчага комплексу «H2O» – новым аб’екце сацыяльнай сферы Магілёва, які цалкам адпавядае сусветным стандартам.

Па словах арганізатараў, спаборніцтвы будуць спрыяць папулярызацыі водных відаў спорту ў рэгіёне: «Гарманічнае развіццё дзіцяці – гэта спалучэнне разумовай нагрузкі і фізічных актыўнасцяў. У сваю чаргу, воднае пола выдатна гэтаму спрыяе: юны спартсмен умацоўвае сваю фізічную форму і здароўе, вучыцца распрацоўваць тактыку гульні і ўзаемадзейнічаць у камандзе. Больш за тое, воднае пола з’яўляецца адным з найстарэйшых алімпійскіх відаў спорту, які адрозніваецца відовішчнасцю і дынамічнасцю».

Дарэчы, годны ўклад у развіццё гэтага віду спорту ў рэгіёне ўносіць Ігар Бычкоў – беларускі і расійскі ватэрпаліст, уладальнік кубка Еўропы і Расіі. Сваю спартыўную кар’еру, якая налічвае ўжо больш за два дзясяткі гадоў, ён пачынаў з юнага ўзросту менавіта ў Магілёве. Сваім прыкладам ён хоча паказаць хлопцам, як важна імкнуцца да новых дасягненняў і перамог у абранай імі справе, а таксама стымуляваць іх на развіццё прафесійнай спартыўнай кар’еры.

БЕЛТА