Тут выхоўваюць патрыётаў: Андрэй Іванец сустрэўся з выхаванцамі кадэцкага вучылішча ў Магілёве

Магілёўскае кадэцкае вучылішча – узор адукацыйных устаноў, якія выхоўваюць сапраўдных патрыётаў. Пра гэта заявіў міністр адукацыі Андрэй Іванец падчас семінара для кіраўнікоў па ваенна-патрыятычным выхаванні ў Магілёўскім абласным кадэцкім вучылішчы імя Героя Савецкага Саюза Яўгена Нікалаенкі.

«Мы нездарма выбралі ў якасці пляцоўкі для сустрэчы менавіта Магілёўскае кадэцкае вучылішча. Гэта ўзор такіх устаноў адукацыі, якія выхоўваюць сапраўдных патрыётаў, людзей, адданых не толькі сваёй справе, але і сваёй радзіме. Семінар пройдзе ў форме дыялогу, абмену практыкамі і вопытам работы. Мы разумеем, што ў пытанні ваенна-патрыятычнага выхавання моладзі не можа быць стандартных рашэнняў, падыходы могуць быць абсалютна рознымі, але мэта ў нас адна», – сказаў Андрэй Іванец.

Вітаючы выхаванцаў кадэцкага вучылішча, міністр пажадаў ім стойкасці духу, веры ў сябе і адданасці Айчыне. «Наведваючы ваша кадэцкае вучылішча, мне вельмі прыемна бачыць, што ў нас наперадзе вялікая будучыня. Гледзячы на вас, мы выдатна разумеем, што менавіта такія маладыя людзі, адданыя краіне, стануць не толькі рэальнасцю, але і нашым будучым», – канстатаваў ён.

У 2021/2022 навучальным годзе ў кадэцкім вучылішчы навучаюцца 162 кадэты. Установа адукацыі ў поўным аб’ёме забяспечана вучэбнай, вучэбна-метадычнай літаратурай, у тым ліку вучэбна-метадычнымі комплексамі для правядзення факультатыўных заняткаў. У межах дадатковай адукацыі кадэты наведваюць заняткі ў аб’яднаннях па інтарэсах «Рукапашны бой», «Стральба кулявая», займаюцца харэаграфіяй. У вучылішчы створаны і функцыянуе вакальна-інструментальны ансамбль. У валанцёрскім атрадзе «Сэрца воіна» знаходзяцца ўсе кадэты вучылішча. Для навучэнцаў 8-х і 10-х класаў штогод праводзяцца вучэбна-палявыя зборы на базе в/ч 72471 Пашкава.

Міністр адукацыі мае намер таксама наведаць Магілёўскі дзяржаўны абласны інстытут развіцця адукацыі, дзе адбудзецца ўзнагароджанне пераможцаў IV Рэспубліканскага конкурсу «Камп’ютар. Адукацыя. Інтэрнэт», і іншыя ўстановы адукацыі рэгіёна.

БЕЛТА