Творчая сустрэча з акцёрамі агучкі мультсерыяла «Маша і мядзведзь» прайшла ў Магілёве з аншлагам

Творчая сустрэча са спявачкай, актрысай агучвання (голас Машы ў мультсерыяле «Маша і мядзведзь») Юліяй Зунікавай і гукарэжысёрам, акцёрам агучвання (голас Мядзведзя), саўнд-дызайнерам Барысам Кутневічам з Масквы прайшла ў рамках XXVII Міжнароднага фестывалю анімацыйных фільмаў. У кінатэатр «Чырвоная Зорка» 26 верасня рабяты ішлі як з бацькамі, так і цэлымі класамі.

Голасам Юлі галоўная гераіня любімага мультсерыяла дзяцей з усяго свету гаворыць ужо больш за пяць гадоў, яна агучыла звыш 100 серый і праспявала ў іх каля 50 песень. Дзяўчынка не раз сустракалася з маленькімі "фанатамі" ў розных гарадах і краінах, а сёлета дабралася і да Магілёўскай вобласці - малой радзімы яе прабабулі. Але вось як выглядае Мядзведзь, голас якога чуе ў серыяле дзятвы, ніхто раней не бачыў. І юным гледачам "Анімаёўкі" прадставілася ўнікальная магчымасць - першымі пагутарыць з любімым персанажам і нават задаць яму пытанні.

А пытанняў у рабят быў бясконцы паток. Іх цікавіла і тое, як акцёры патрапілі на студыю, што адчулі, калі іх галасы зацвердзілі для галоўных герояў, якую адукацыю трэба атрымаць акцёру агучкі, наколькі гэта цяжкая праца і ці плацяць за яе ганарар дзецям. Прасілі распавесці пра магілёўскія карані Юлі-Машы, ці крыўдуе дзяўчынка на тое, што яе называюць іншым імем, і ці такі цярплівы і добры Барыс-Мішка ў жыцці. Прасілі герояў паўтарыць любімыя фразачкі з мультыка і праспяваць песню. Што з радасцю было імі выканана.

Пасля размовы і прагляду конкурснага мультфільма, у фае ўсе ахвочыя маглі атрымаць ад Барыса Кутневіча і Юліі Зунінай аўтографы і сфатаграфавацца з імі на памяць.

Юлія Таранава, фота аўтара