Творчы праект «З мараю пра лета...» стартаваў у Магілёўскім мастацкім музеі

Выстава дзіцячых малюнкаў «З мараю пра лета...» адкрываецца сення ў Магілёўскім абласным мастацкім музеі імя П.В. Масленікава. Аб гэтым расказалі ва ўстанове культуры.

Творчы праект падрыхтавалі выхаванцы ўзорнай студыі выяўленчага мастацтва «Шар» Палаца культуры вобласці сумесна з мастацкім музеем. У праекце прынялі ўдзел больш за 20 дзяцей розных узростаў, якія прадставілі сваё бачанне летняй тэматыкі. Юныя мастакі выканалі работы ў некалькіх тэхніках - пастэль, графіка, акварэль, гуаш і інш. Іх аб'ядноўвае добры настрой, а таксама адкрыты і пазітыўны погляд на навакольны свет.

«Ідэя намаляваць лета нарадзілася ў сценах нашай студыі некалькі месяцаў таму, калі на вуліцы было яшчэ холадна і як ніколі хацелася яркіх летніх фарбаў і сонечнага настрою, - расказала кіраўнік студыі выяўленчага мастацтва «Шар» Наталля Талантава. - У сваіх падагульняючых работах дзеці адлюстравалі разнастайныя сюжэты. Тут ёсць і смакавае ўспрыманне гэтай пары года ў выглядзе адлюстравання любімых ягад і фруктаў, і дачныя сюжэты з чароўнасцю загараднага жыцця, і турыстычныя матывы з момантамі замежных падарожжаў».

Паводле слоў кіраўніка студыі выяўленчага мастацтва, акрамя асноўных работ, прадстаўленых на выставе і аформленых у адпаведнасці з пэўнымі патрабаваннямі, наведвальнікі музея змогуць азнаёміцца з малюнкамі, якія дзеці стваралі па-за сценамі студыі як дамашняе заданне. «Гэта фантазійныя замалёўкі на тэму «Лета - гэта я», якія будуць цікавымі для творчай моладзі, - адзначыла Наталля Талантава. - Замалёўкі будуць размешчаны на асобным стэндзе і таксама знойдуць свайго гледача».

Выстава «З мараю пра лета...» прадоўжыцца ў абласным мастацкім музеі імя П.В. Масленікава да канца ліпеня.

БЕЛТА