У ААТ «Світанак ім. К.П. Арлоўскага» ўшаноўвалі тысячнікаў

Цырымонію ўзнагароджання перадавікоў у ААТ «Світанак ім. К.П. Арлоўскага» правялі проста ў полі. Мерапрыемства не зацягвалі: у хлебаробаў кожная хвіліна на рахунку. Лідэрам жніва ўручылі грашовыя прэміі, граматы і падарункі ад Магілёўскага аблвыканкама, прафсаюзаў, БРСМ, сказалі словы падзякі за нялёгкую працу хлебароба - і героі ўрачыстасці паспяшаліся прадоўжыць сваю работу.

Першым у вобласці маладзёжным экіпажам-тысячнікам стаў тандэм у складзе Андрэя Дразда і Аляксандра Краўцова. Да гэтага тысячнага намалоту дасягалі камбайнеры Сяргей Май і Рыгор Бокач з ЗАТ «Сервалюкс-Агра» Магілёўскага раёна.

Сярод вадзіцеляў-тысячнікаў як работнікі «Світанку» з вялікім працоўным стажам, так і навічкі: Сяргей Цмыг, Сяргей Іваніцкі, Генадзь Гукаў, Аляксандр Белы.

Аляксандр Белы раней быў вадзіцелем аўтобуса ў сталіцы, на адвозцы збожжа працуе ўпершыню:

- Гэта таксама вельмі адказна, каб адвезці хлеб з поля без страт. Я пераехаў у аграгарадок Мышкавічы з Мінска, купіў тут дом, бо і да прыроды бліжэй, і зарабіць можна нядрэнна, калі не ленавацца.

А вось у Генадзя Гукава гэта ўжо 26-я ўборачная. У ААТ «Світанак ім. К.П. Арлоўскага» на цяплічным камбінаце працуе жонка. Генадзь кажа, што яго задача на жніве - не даць прастойваць ні хвіліны камбайну з напоўненым бункерам:

- Машыне чацвёрты год - новенькая. А вось прычэпы трэба добра падрыхтоўваць, запенивать шчыліны, каб ніводны каласок не страціць.

Першы намеснік дырэктара ААТ «Світанак ім. К.П. Арлоўскага» Аляксандр Жылінскі адзначае, што віды на ўраджай аптымістычныя насуперак капрызам надвор'я:

- На гэтым полі ўбіраем азімую пшаніцу гатунку беларускай селекцыі «гірлянда», сярэдняя ўраджайнасць 56 цэнтнераў з гектара. Ёсць падгарэлыя ўчасткі, але ў цэлым ураджайнасць нязначна горшая за леташнюю. Выконвалі ўсе тэхналогіі, уносілі ўгнаенні, сродкі абароны. Азімы ячмень убралі: быў 230 гектараў, у наступным плануем ужо 400. Ураджайнасць сёлета 55 ц/га, летась была 77. Рапс 1000 гектараў, ураджайнасць на дадзены момант - 44 цэнтнеры з гектара. На раніцу рапсу ўбралі 705 гектараў. Застаецца ўбіраць пшаніцу, трыцікале, ячмень, гарох, проса - 3300 усяго было да ўборкі. Працуем ад зары да зары. Задзейнічаны чатыры сушылкі, вільготнасць пакуль завялікая. Уся тэхніка ў полі: 14 камбайнаў, 9 машын на адвозцы. Сёлета два новыя камбайны. Мы працавалі на гэты ўраджай цэлы год, зараз момант ісціны. Усе працаўнікі свае, прыцягнутых няма. Абедамі, спецвопраткай забяспечаны.

Першы намеснік Магілёўскага аблвыканкама Сяргей Савіцкі адзначыў, што ў найбліжэйшыя пару дзён аграрыі вобласці выйдуць у поўнай меры ва ўборачную прыпар.

- У гэтым годзе няма такога разрыву паміж паўднёвымі і паўночнымі раёнамі. Убралі азімы ячмень, убіраем азімы рапс, на раніцу было ўбрана крыху больш за палову. Цяпер мы шчыльна ўваходзім ва ўборку асноўных культур. У гэтым годзе нядрэнна падышлі да гатоўнасці камбайнаў - 99% спраўныя. Калі будзе пік уборачнай - і астатнія адзінкі тэхнікі падцягнем. Людзі правільна разумеюць пастаўленую задачу, усе гатовы да правядзення ўборачнай кампаніі. Што тычыцца ролі абласных уладаў, то ў нас сёння адзіная задача - забяспечыць бесперабойную пастаўку паліва. Мы сёння ўжо наладжваем раёны на падрыхтоўку да восеньскай сяўбы.

СБ, фота mogilevnews.by