Рус Бел Eng 中文

У абласным конкурсе па стварэнні канцэпцыі бяспечнай попельніцы перамог Кірыл Кадошкін са Шклова

Паводле статыстыкі пажараў, попельніцай нашы грамадзяне карыстаюцца рэдка. Усё больш аддаюць перавагу паліць прама ў ложку, нярэдка знаходзячыся «пад градусам». Вынік – сумнеўнае задавальненне, падпаленыя хаты і... загубленыя жыцці.

Як змяніць сітуацыю? На жаль, адзінага «рэцэпту бяспекі» пакуль няма, але «інгрэдыент рэцэпту» ўжо гатовы. І гэта – бяспечная попельніца. Усё пачалося са старту рэспубліканскай акцыі «Не прапалі сваё жыццё», скіраванай на папярэджанне пажараў і гібелі людзей ад іх па прычыне неасцярожнага абыходжання з агнём пры курэнні. «Усім жадаючым было прапанавана паўдзельнічаць у інавацыйным конкурсе па стварэнні канцэпцыі бяспечнай попельніцы. Прызначэнне попельніцы – выклікаць жаданне ў курца патушыць недакурак і пазбегнуць бяды. Ніякіх абмежаванняў і межаў для ўяўлення і фантазіі. Адзіная ўмова – рэальнасць ўвасаблення праекта», – расказала старшы інспектар абласнога ўпраўлення МНС Вольга Нехарошых.

І жадаючыя знайшліся. Прычым з розных раёнаў і гарадоў Магілёўскай вобласці. Прадстаўленыя работы ўражвалі сваім крэатывам і прадуманасцю. Шляхам гарачых дэбатаў і аргументаў была абрана самая бяспечная попельніца – праца Кірыла Кадошкіна, навучэнца УА «Шклоўскі дзяржаўны прафесійны ліцэй № 12», якая адлюстроўвае ўсю згубнасць звычкі курэння.

Гэта праца будзе прадстаўлена на суд журы ў рэспубліканскім інавацыйным конкурсе і, хто ведае, магчыма, хутка ўвойдзе ў масавую вытворчасць.

Пры выкарыстанні матэрыялаў актыўная гіперспасылка на mogilev-region.gov.by абавязковая