У аграгарадкі Чавускага раёна прыйдзе чыстая вада

На днях жыхароў Радамлі і Каменкі Чавускага раёна парадавалі: па падпраграме «Чыстая вада» тут адкрыліся станцыі абезжалезвання. Неабходнасць у будаўніцтве была выклікана тым, што ў гэтых аграгарадках у пітной вадзе выяўлена перавышэнне нормы ўтрымання жалеза і вяскоўцам даводзілася яе кіпяціць, каб пазбавіцца ад асадка і паху.

Начальнік водаправодна-каналізацыйнага ўчастка Чавускага раёна філіяла «Магілёўскі водаканал» Васіль Ларчанка адзначыў, што станцыя ў Радамлі даводзіць якасць пітной вады да нарматыўных паказчыкаў:

– Станцыя тыпавая: невялікі будынак з сучасным абсталяваннем для ачысткі. Праз два фільтры, у якія засыпаны кварцавы пясок, праходзіць узбагачаная кіслародам вада з свідравіны. Жалеза асядае, а па трубах ідзе ўжо вычышчаная вадкасць. Праца і кіраванне станцыяй цалкам аўтаматычныя. Прадукцыйнасць 6,5 кубаметру ў гадзіну – такой магутнасці хапае на ачыстку вады, якую спажываюць жыхары ў ежу, на бытавыя патрэбы, паліванне агародаў. Закладваецца і расход у выпадку неабходнасці тушэння пажараў. На будаўніцтва станцыі сышло ўсяго некалькі месяцаў, на яе затрачана больш за 330 тысяч рублёў.

Для мясцовай жыхаркі Любові Бялькевіч падобны аб’ект – падарунак:

– Вада ў нас была ржавая. Уявіце, усё гэта асядала на сантэхніцы. Ванну трэба было мыць ледзь ці не кожны дзень. Таму для падрыхтоўкі ежы выкарыстоўвалі ваду з калонкі, якая ёсць у аграгарадку. Гэта асобная свідравіна, таму якасць там прыкметна лепшая. Новая станцыя, вядома, вырашыць праблему.

Аналагічная станцыя пачала працаваць у Каменцы, выдаткавалі на яе 380 тысяч рублёў.

СБ