Усяго два тыдні таму гэты экіпаж камбайнераў ушаноўвалі як першых тысячнікаў на ўборцы збожжавых культур на Бабруйшчыне, яшчэ праз тыдзень – як лідараў-двухтысячнікаў. Учора, 23 жніўня, механізатары СВК «Гігант» Алег Вяроўкін і яго памочнік Максім Быкаў зноў прымалі віншаванні на жніве-2022.
Гэтым разам кіраўнік выканаўчай улады раёна Аляксандр Сухадольскі, лідары прафсаюзных арганізацый Віталь Сідзюк і Надзея Дудаль адправіліся на поле паблізу вёскі Бірча, каб павіншаваць гэты згуртаваны перадавы тандэм з заваяваннем запаветнай мяжы па намалоце ў 3000 тон збожжа.
Вітаючы найлепшых хлебаробаў з пажаданнямі далейшых працоўных поспехаў, Аляксандр Сухадольскі адзначыў:
– Трэцяе месца ў вобласці сярод трохтысячнікаў – вялікае дасягненне, спалучанае з вялікай працай, неймавернай нагрузкай на людзей і на тэхніку. Гэтыя тысячы проста так не даюцца. З дня ў дзень працаваць дапазна, а ранняй раніцай, старанна падрыхтаваўшы камбайн, настойліва і мэтанакіравана ісці да чарговай мэты... «Лексион-760», на якім вось ужо трэці раз за восем гадоў механізатары, якія сядзелі за яго штурвалам, дасягаюць трохтысячнай адзнакі, працягвае доблесна крочыць па палях дзякуючы клапатлівым рукам іх гаспадароў. Калі б не здарыліся на днях невялікія паломкі камбайна, цалкам магчыма, Алег і Максім былі б першыя сярод трохтысячных адзнак на Магілёўшчыне. Дзякуючы такім надзейным, верным свайму прызванню паважаным працаўнікам, ды і ўсім, хто прымае актыўны ўдзел у жніве, перажываючы за агульную справу, мы павінны паспяхова выканаць пастаўленую задачу – намалаціць у бункернай вазе 38 тысяч тон збожжа.
Перадавікі жніва Вяроўкін і Быкаў, стаж працы кожнага з якіх у гаспадарцы складае больш за паўтара дзясятка гадоў, пацвердзілі, што настроеныя па-баявому і спыняцца на дасягнутым не збіраюцца.
Кіраўнік «Гіганта» выказаў упэўненасць у тым, што ў будучай уборачнай кампаніі можна разлічваць на яшчэ больш высокі вынік, а значыць, на лабавым шкле сельгасмашыны таксама ганарліва будзе красавацца лічба, толькі наміналам вышэйшая. А імёны напэўна будуць тыя ж. На думку Васіля Жука, словам, справай і выніковымі лічбамі «Гігантаўцы» памнажаюць славу і традыцыі прадпрыемства.
– Добрасумленнасць і адказнасць – дзве галоўныя якасці, якія ўласцівыя нашым працаўнікам і вызначаюць поспех па забеспячэнні харчовай праграмы краіны. Сённяшняя падзея – не проста шчаслівая выпадковасць. Гэта ў ліку іншага разумны падыход да земляробства, насеннага матэрыяла, угнаенняў і, вядома ж, вялікая любоў да роднага краю, якая выяўляецца ва ўдарнай працы на агульны вынік.
Пры выкарыстанні матэрыялаў актыўная гіперспасылка на mogilev-region.gov.by абавязковая
