У Беларусі адзначаецца Дзень Кастрычніцкай рэвалюцыі

Дзень Кастрычніцкай рэвалюцыі адзначаецца сёння ў Рэспубліцы Беларусь.

Дзень Кастрычніцкай рэвалюцыі быў заснаваны ўказам Прэзідэнта Рэспублікі Беларусь ад 26 сакавіка 1998 года нумар 157 «Аб дзяржаўных святах, святочных днях і памятных датах у Рэспубліцы Беларусь» і з'яўляецца выхадным днём у краіне.

Вялікая Кастрычніцкая сацыялістычная рэвалюцыя адбылася 25 кастрычніка (7 лістапада па новым стылі) 1917 года. Гэта адна са значных падзей XX стагоддзя, якая карэнным чынам паўплывала на ход далейшай гісторыі. У выніку рэвалюцыі беларускі народ пачаў будаўніцтва ўласнай дзяржавы, развіў эканамічны і інтэлектуальны патэнцыял, захаваў і ўзбагаціў нацыянальную культуру.

Пасля Кастрычніцкай рэвалюцыі адбылося самавызначэнне Беларусі, стварэнне нацыянальнай дзяржавы на савецкай аснове. На карысць менавіта гэтай формы дзяржаўнасці гаварылі настроі беларускага грамадства, прывабнасць палітычнай праграмы бальшавікоў, узрослая ваенная моц Савецкай Расіі на Заходнім фронце. БССР першапачаткова заняла тэрыторыю шасці паветаў былой Мінскай губерні - толькі частку Цэнтральнай Беларусі. Але маленькая рэспубліка плошчай усяго прыкладна 50 тыс. кв.км і з насельніцтвам каля 1,5 млн чалавек стала адной з сузаснавальнікаў Савецкага Саюза і сабрала вакол сябе спачатку ўсходнебеларускія, а потым і заходнебеларускія землі. Сучасная Беларусь - прамы спадчыннік і правапераемнік БССР, а БССР стала магчымай толькі пасля Кастрычніцкай рэвалюцыі.

Мінула ўжо 107 гадоў з моманту падзеяў Кастрычніцкай рэвалюцыі. У нашы дні Беларусь упэўнена ідзе па шляху суверэннага развіцця, здолеўшы захаваць і прымножыць дасягненні савецкага перыяду. У нашай краіне склалася ўласная мадэль дзяржавы з моцнай сацыяльнай палітыкай і сацыяльна арыентаванай эканомікай, накіраванымі на павышэнне якасці жыцця грамадзян і супольнасці ў цэлым.

У Беларусі сфарміравана ўнікальная палітычная мадэль з развітой сістэмай прадстаўнічых органаў улады. Наданне Усебеларускаму народнаму сходу канстытуцыйна-прававога статусу ўмацавала асновы беларускай дзяржаўнасці і паказала, што беларусы з'яўляюцца згуртаванай нацыяй, якая можа самастойна ставіць перад сабой мэты і дасягаць іх.

Захоўваючы гэты дзень сярод іншых памятных дат, мы тым самым аддаём даніну памяці таму часу, калі наш народ атрымаў імпульс для развіцця беларускай дзяржаўнасці. 7 лістапада 2023 года Прэзідэнт Беларусі Аляксандр Лукашэнка ў віншаванні народу сказаў, што нам нельга забывацца на тое, «кастрычніцкая рэвалюцыя адкрыла новую старонку ў айчыннай гісторыі, паслужыўшы імпульсам для развіцця нацыянальнай беларускай дзяржаўнасці. Пераадолеўшы ў нялёгкім дваццатым стагоддзі шматлікія выпрабаванні, раскрыўшы патэнцыял творчасці і стварэння, беларусы занялі дастойнае месца ў вялікай сям'і народаў свету». Кіраўнік дзяржавы таксама выказаў упэўненасць у тым, што, ведаючы сваё мінулае, абараняючы гістарычную праўду, паважаючы і прымнажаючы дасягненні ранейшых пакаленняў, беларусы ствараюць мірную будучыню для дзяцей і ўнукаў.

У многіх гарадах Беларусі 7 лістапада праходзяць урачыстыя мітынгі з ускладаннем кветак да помніка Леніна, святочныя канцэрты, розныя дыялогавыя пляцоўкі і асветніцкія мерапрыемствы. Да Дня Кастрычніцкай рэвалюцыі ў краіне традыцыйна рэканструююць і ўводзяць у строй шэраг важных і буйных аб'ектаў, у тым ліку сацыяльных, сярод якіх жылыя дамы, дзіцячыя сады, навучальныя ўстановы, паліклінікі, спартыўныя комплексы, масты і дарогі.

БЕЛТА