RU BY EN 中文
Twitter Instagram

У Беларусі вызначаны тэрміны правядзення ўступнай кампаніі ў ВНУ ў 2019 годзе

Міністэрства адукацыі пастановай ад 19 сакавіка нумар 29 вызначыла тэрміны правядзення ў 2019 годзе ўступнай кампаніі ў ВНУ для атрымання вышэйшай адукацыі першай ступені. Устаноўлены, у прыватнасці, тэрміны прыёму дакументаў ад абітурыентаў. Такая інфармацыя размешчана на Нацыянальным прававым інтэрнэт-партале.

Так, з 12 да 17 ліпеня дакументы змогуць падаваць тыя, хто мае намер паступаць у ВНУ на бюджэтнае або на платнае аддзяленні. Ад тых, хто хацеў бы стаць студэнтам завочнага аддзялення ў ВНУ сельгаспрофілю (за кошт бюджэтных сродкаў і на платнай аснове), дакументы чакаюць з 15 лістапада да 5 снежня.

Для абітурыентаў, якія паступаюць у ВНУ для атрымання вышэйшай адукацыі на платнай аснове і не здаюць уступныя іспыты, складзены асобныя графікі. З 12 да 31 ліпеня дакументы прымаюць у Акадэміі МУС, Магілёўскім інстытуце МУС, Універсітэце грамадзянскай абароны МНС. З 12 ліпеня да 2 жніўня - у Беларускай дзяржаўнай акадэміі мастацтваў, Беларускай дзяржаўнай акадэміі музыкі, Беларускім дзяржаўным універсітэце культуры і мастацтваў. У астатнія ВНУ дакументы трэба будзе несці з 12 ліпеня да 4 жніўня.

Для выпускнікоў профільных класаў педагагічнай накіраванасці, якія паступаюць на педспецыяльнасці, Мінадукацыі ўстанавіла тэрмін падачы дакументаў з 12 да 14 ліпеня.

Мінадукацыі назвала таксама тэрміны правядзення ўступных іспытаў. Ва Універсітэце грамадзянскай абароны МНС яны пройдуць з 18 па 21 ліпеня, у Беларускай дзяржаўнай акадэміі мастацтваў, Беларускай дзяржаўнай акадэміі музыкі, Беларускім дзяржаўным універсітэце культуры і мастацтваў - з 18 да 26 ліпеня. У сельскагаспадарчых ВНУ ўступныя іспыты адбудуцца ў два этапы - з 18 да 25 ліпеня (вочная форма) і з 6 да 15 снежня (завочная форма). У астатніх універсітэтах - з 18 да 24 ліпеня.

Што датычыцца тэрміну залічэння абітурыентаў на бюджэтныя месцы, то ў Ваеннай акадэміі, Інстытуце пагранічнай службы, Універсітэце грамадзянскай абароны МНС ён устаноўлены да 24 ліпеня. У іншых ВНУ (акрамя завочнай формы) Мінадукацыі вызначыла тэрмін да 28 ліпеня, у ВНУ сельскагаспадарчага профілю ў завочнай форме атрымання адукацыі - да 20 снежня.

На платныя месцы ўстаноўлены такія тэрміны залічэння абітурыентаў: да 2 жніўня - у сілавых ВНУ (Акадэмія МУС, Магілёўскі інстытут МУС, Універсітэт грамадзянскай абароны МНС), да 3 жніўня - у творчых (Беларуская дзяржаўная акадэмія мастацтваў, Беларуская дзяржаўная акадэмія музыкі, Беларускі дзяржаўны ўніверсітэт культуры і мастацтваў). У астатнія ВНУ абітурыентаў павінны будуць залічыць да 6 жніўня. Асобна ўстаноўлены тэрміны для завочнага аддзялення ВНУ сельскагаспадарчага профілю - да 20 снежня.

Пастановай таксама вызначаны тэрміны залічэння абітурыентаў і дадатковага набору ў дзяржаўныя ВНУ на месцы, вызначаныя кантрольнымі лічбамі прыёму, якія засталіся вакантнымі пасля залічэння абітурыентаў.

Акрамя таго, устаноўлены тэрміны ўступнай кампаніі для замежных грамадзян і асоб без грамадзянства, а таксама для грамадзян Украіны і асоб без грамадзянства, якія пражывалі (як правіла, не менш за год) на тэрыторыі Данецкай і Луганскай абласцей і прыбылі ў Беларусь для атрымання дазволаў на часовае або пастаяннае пражыванне.

Пастанова ўступае ў сілу пасля афіцыйнага апублікавання.

БЕЛТА
 

Пры выкарыстанні матэрыялаў актыўная гіперспасылка на mogilev-region.gov.by абавязковая