У Беларусі вызначылі арганізацыі, якія маюць права на ўласны сцяг

Прэзідэнт Беларусі Аляксандр Лукашэнка 6 ліпеня падпісаў указ № 258 «Аб афіцыйных геральдычных сімвалах», паведамілі ў прэс-службе кіраўніка дзяржавы.

У дакуменце вызначаны пералікі органаў і арганізацый, якія маюць права на ўстанаўленне сцягоў, і асоб, упаўнаважаных на нашэнне форменнай вопраткі.

Паколькі сцяг з’яўляецца ганаровым сімвалам гонару, доблесці і славы (воінскай або працоўнай), у пералік уключаны ўсе ведамствы, у якіх сёння ёсць заснаваныя сцягі, а таксама шэраг дадатковых структур для іх магчымага заахвочвання за асаблівыя заслугі перад краінай. Сярод іх урад, абедзве палаты парламента, Канстытуцыйны суд, Дзяржаўны сакратарыят Савета бяспекі, іншыя дзяржорганы і арганізацыі.

Па ўказе асобамі, упаўнаважанымі на нашэнне форменнай вопраткі, з’яўляюцца суддзі, пракурорскія работнікі, вайскоўцы, супрацоўнікі органаў унутраных спраў і ваенізаваных структур, службаў інкасацыі банкаў, сувораўцы, кадэты і іншыя. Форменнае адзенне падкрэслівае асаблівы статус такіх асоб і паказвае на іх службовую ці іншую ведамасную прыналежнасць.

БЕЛТА