У Краснапольскім раёне правядуць конкурс прафесійнага майстэрства «Малады спецыяліст»

Конкурс прафесійнага майстэрства «Малады спецыяліст – 2022» пройдзе 25 лістапада ў Краснапольскім раённым цэнтры культуры. Пра гэта паведамілі ў Магілёўскім абласным метадычным цэнтры народнай творчасці і культурна-асветнай працы.

У спаборніцтве прымуць удзел маладыя спецыялісты, якія прыбылі па размеркаванні ў Краснапольскі раён у 2021–2022 гадах і раней не ўдзельнічалі ў гэтым конкурсе. Ім трэба будзе прадэманстраваць свае прафесійныя і творчыя якасці, а таксама знаходлівасць і талент.

Конкурс прымеркаваны да Года гістарычнай памяці і будзе складацца з некалькіх этапаў. Так, удзельнікі раскажуць пра сябе ў візітнай картцы «Сардэчна запрашаем», у тэатралізаванай форме правядуць абарону выбару сваёй прафесіі «Прафесійны дэбют», прадэманструюць эрудыцыю ў інтэлектуальным конкурсе «Палёт думкі». Завершыць выступленні выпрабаванне «Сузор’е талентаў» і конкурс груп падтрымкі «Мы – адна каманда».

Падчас конкурсу маладых спецыялістаў гледачоў пацешаць сваімі выступленнямі салісты раённага цэнтра культуры. Уваход на мерапрыемства вольны.

БЕЛТА