У ліку пераможцаў рэспубліканскага конкурсу маладых журналістаў «Прэс-код» прадстаўнікі Магілёўшчыны

Падчас урачыстай цырымоніі адкрыцця Дня моладзі на «Славянскім базары» ў Віцебску адбылося ўзнагароджанне пераможцаў рэспубліканскага конкурсу маладых журналістаў «Прэс-код».

Віншуючы з заслужанымі ўзнагародамі, міністр інфармацыі Уладзімір Пярцоў пажадаў усім добрага настрою і новых сяброў.

– Мы на працягу паўгода разглядалі заяўкі ад маладых, не тое каб класічных журналістаў, а тых, хто сябе называе модным словам «блогер». Тых, хто, маючы ў руках мабільны тэлефон або планшэт, стварае новыя журналісцкія формы, фатаграфіі, паведамленні, пасты ў сацыяльных сетках. Мы ўпэўнены, што з 350 удзельнікаў гэтага конкурсу, хай нават і не фіналістаў, і не лаўрэатаў, ёсць тыя, хто ў найбліжэйшай будучыні папоўніць рады нашых дзяржаўных і недзяржаўных, цэнтральных і рэгіянальных медыя, – выказаў надзею Уладзімір Пярцоў.

Пераможцамі ў намінацыі «Найлепшы фотарэпартаж» сталі: у першай узроставай групе – навучэнка сярэдняй школы №34 Магілёва Паліна Есіпава, у другой узроставай групе – спецыяльны карэспандэнт інфармацыйнага агенцтва «Магілёўскія ведамасці» Марыям Табагары.

У намінацыі «Найлепшы відэасюжэт аб памятных месцах Беларусі, вядомых людзях, знамянальнай падзеі» адзначаны ў другой узроставай групе рэдактар аддзела падрыхтоўкі ТБ-праграм РУП РТЦ «Тэлерадыёкампанія Магілёў» Сяргей Пеклін.

У намінацыі «Найлепшая карыкатура па найбольш вострай сацыяльнай тэматыцы» перамогу атрымалі: у першай узроставай групе – навучэнка сярэдняй школы №20 Бабруйска Маргарыта Анц.

– Прыемна, што нашу працу бачаць, заўважаюць на рэспубліканскім узроўні і ўзнагароджваюць, – падзялілася ўражаннем наша калега, журналіст інфармацыйнага агенцтва «Магілёўскія ведамасці» Марыям Табагары.

Новы праект для маладых журналістаў стартаваў на VIII Форуме маладых журналістаў «Традыцыйныя і новыя медыя: выклікі і магчымасці».

mogilevnews.by, фота СБ