У Магілёўскай паліклініцы № 6 для дыягностыкі выкарыстоўваюць новы імунахемілюмінесцэнтны аналізатар

У Магілёўскай паліклініцы № 6 для дыягностыкі выкарыстоўваюць новы імунахемілюмінесцэнтны аналізатар. Цяпер даступны магілёўцам яшчэ большы спектр даследаванняў крыві. Прычым вынікі можна атрымаць у дзень здачы аналізаў, у тым ліку на электронную пошту і мабільны тэлефон.

Прыбор дазваляе даследаваць шырокую лінейку палавых гармонаў, поўную панэль паказчыкаў шчытападобнай залозы, вітаміны, маркеры касцявога абмену і крыватвору, онкамаркеры.

– Магчымасць праводзіць падобную дыягностыку вельмі неабходная, бо гарманальныя і метабалічныя расстройствы сустракаюцца ўсё часцей. Важна своечасова выявіць праблемы і пачаць лячэнне, – адзначыла загадчыца клініка-дыягнастычнай лабараторыі Вольга Кавалёва. – Імунахемілюмінесцэнтны аналізатар дае самыя дакладныя вынікі.

На новым прыборы праведзена каля 5 тыс. даследаванняў. Абследавацца прыязджаюць жыхары з усёй вобласці.

Дарэчы, аналізатар і рэактывы паліклініка набыла за ўласныя сродкі.

medvestnik.by