У Магілёўскай вобласці 1 снежня стартуе дабрачынны марафон «Сагрэем дзіцячыя сэрцы»

У Магілёўскай вобласці 1 снежня стартуе дабрачынны марафон «Сагрэем дзіцячыя сэрцы», як паведамілі ў Магілёўскім абласным аддзяленні РГА «Беларускі дзіцячы фонд».

Маштабная акцыя праводзіцца ў рэгіёне дзявятым разам напярэдадні навагодніх і калядных святаў. «Дзіцячыя дамы і інтэрнатныя ўстановы знаходзяцца на дзяржаўным фінансаванні, для многіх арганізацый і прыватных асоб ужо стала добрай традыцыяй аказваць ім пасільную дапамогу, – адзначылі суразмоўцы. – Аднак у нашым грамадстве ёсць вялікая катэгорыя дзяцей, якія знаходзяцца ў вельмі складанай сітуацыі і практычна не атрымліваюць дапамогі ў выглядзе прыватных ахвяраванняў. Пры гэтым іх матэрыяльнае становішча часта нашмат горшае, чым у дзяцей, якія знаходзяцца на дзяржзабеспячэнні».

Марафон, які працягнецца да 31 студзеня 2021 года, будзе ўключаць цэлы комплекс мерапрыемстваў. Сабраныя падчас іх правядзення сродкі будуць накіраваныя на аказанне дапамогі дзецям-сіротам, якія знаходзяцца пад апекай, дзецям-інвалідам, хворым дзецям, дзецям з малазабяспечаных і шматдзетных сем’яў.

Прыняць удзел у марафоне можа кожны, арганізаваўшы ўласную акцыю для дзяцей альбо пералічыўшы сродкі на дабрачынны рахунак.

Арганізатарам марафону «Сагрэем дзіцячыя сэрцы» выступае Магілёўскае абласное аддзяленне РГА «Беларускі дзіцячы фонд» пры падтрымцы Магілёўскага аблвыканкама.
Усіх неабыякавых просяць адгукнуцца на акцыю дабра.

Ред.