У Магілёўскай вобласці атэстаты атрымае каля 5,5 тыс. адзінаццацікласнікаў

У Магілёўскай вобласці атэстаты атрымае каля 5,5 тыс. адзінаццацікласнікаў. Пра гэта расказаў першы намеснік начальніка галоўнага ўпраўлення па адукацыі Магілёўскага аблвыканкама Ігар Лашкевіч.

«Сёлета атэстаты аб заканчэнні 11-х класаў атрымае каля 5,5 тыс. школьнікаў у рэгіёне. Усе школы, гімназіі і ліцэі вобласці атрымалі рэкамендацыі, як праводзіць сёлета апошнія званкі і выпускныя вечары. Вядома, звыклых урачыстасцей праз эпідэміялагічную сітуацыю не будзе, але зусім без свята дзеці не застануцца – сціпла, але ўрачыста яны атрымаюць атэстаты», – расказаў Ігар Лашкевіч.

Установам адукацыі сёлета рэкамендавалі праводзіць урачыстыя мерапрыемствы на свежым паветры. Калі колькасць навучэнцаў у школе невялікая, уручэнне будзе праходзіць у адзін этап. Калі класаў многа, у некалькі і без вялікай колькасці людзей.

«Установы адукацыі ўжо пачалі прадумваць сцэнарыі свята, але апошняе слова будзе за адміністрацыяй на месцах. Калі надвор’е не дазволіць праводзіць урачыстыя мерапрыемствы на вуліцы, яны пройдуць у памяшканні. Гэта будуць актавыя залы або класы, але без вялікай колькасці людзей, пры адсутнасці гасцей і з захаваннем дыстанцыі і ўсіх супрацьэпідэмічных мер», – дадаў намеснік начальніка галоўнага ўпраўлення па адукацыі.

БЕЛТА