У Магілёўскай вобласці больш за 70% дзяўчынак ва ўзросце 11 гадоў прышчэплены першай дозай вакцыны супраць ВПЧ

У Магілёўскай вобласці больш за 70 працэнтаў дзяўчынак 11 гадоў атрымалі бясплатную абарону ад віруса папіломы чалавека. Першасную вакцынацыю за кароткі перыяд прайшлі больш за чатыры тысячы юных жыхарак рэгіёну, расказала загадчык аддзела эпідэміялогіі Магілёўскага абласнога цэнтра гігіены, эпідэміялогіі і грамадскага здароўя Крысціна Пятроўская.

Вакцынацыя дапамагае прадухіліць інфікаванне вірусам папіломы чалавека і яго аддаленыя наступствы, звязаныя з узнікненнем раку шыйкі маткі. Але для атрымання прышчэпкі неабходна выканаць дзве асноўныя ўмовы, і ў першую чаргу — узрост, падкрэсліла спецыяліст:

- Імунная сістэма ў 11 гадоў найбольш працаздольная, гэта значыць дае адэкватны імунны адказ на вакцынацыю. Абараніць арганізм неабходна да сустрэчы з вірусам папіломы чалавека: дзяўчынкі прывіваюцца ў гэтым узросце з-за таго, што яшчэ не вядуць палавое жыццё і, такім чынам, інфікаванне не адбылося.

Курс вакцынацыі складаецца з двух ін'екцый: першая праводзіцца ў паліклініцы па месцы жыхарства пасля кансультацыі з педыятрам, другая - праз шэсць месяцаў пасля першай.

Крысціна Пятроўская падкрэсліла, што Беларусь - перадавая краіна ў сферы аховы здароўя, якая арыентуецца на навуковыя даныя і робіць акцэнт на прафілактыку захворванняў:

- Міністэрства аховы здароўя выбрала правільную тактыку і стратэгію для абароны ад распаўсюджанай анкапаталогіі. Лічу, што вакцынацыя ад віруса папіломы чалавека - вялікі прагрэс і прарыў сучаснасці. Тым больш, у рамках нацыянальнага календара прышчэпак, зацверджанага нашым профільным ведамствам, яна праводзіцца бясплатна - гарантыя дзяржавы.

Па словах спецыяліста, дзякуючы інфармацыйнай працы бацькі актыўна ўключыліся ў кампанію па імунізацыі ад віруса папіломы чалавека. У пацвярджэнне - лічбы: калі першую дозу вакцыны ў рэспубліцы атрымалі больш за 65 працэнтаў дзяўчынак, то ў рэгіёне гэты паказчык склаў звыш 70 працэнтаў.

СБ