У Магілёўскай вобласці больш за 70% пажараў адбываецца ў сельскай мясцовасці

За 11 месяцаў 2020 года ў Магілёўскай вобласці адбылося 716 пажараў, больш за 70% з іх мае «сельскі адрас». Па статыстыцы загінулых у агні з паметкай «адзінокі пенсіянер» значыцца амаль кожны трэці, – расказала старшы інспектар абласнога ўпраўлення МНС Вольга Нехарошых.

Так, днём 10 снежня жыхары в. Халстова Быхаўскага раёна заўважылі клубы дыму, якія вырываюцца з вокнаў жылога дома, які належыць 79-гадовай мясцовай жыхарцы, і выклікалі ратавальнікаў. Прыбылым падраздзяленням МНС суседзі паведамілі, што гаспадыня можа знаходзіцца ўнутры. Горшыя апасенні пацвердзіліся: яна была выяўленая на падлозе ў кухні без прыкмет жыцця. Прычына здарэння ўстанаўліваецца.

«Цяжкая гэта доля – адзінота ў старасці. Калі і бачаць гаспадар ці гаспадыня, што старая сяброўка-печка прадзіравілася або струхлела праводка, усё роўна махне рукой: як-небудзь перазімую. Пажылыя людзі вымушаны ў халодны, пажаранебяспечны час заставацца са сваёй бядой сам-насам, – падкрэсліла Вольга Нехарошых. – Калі вашы састарэлыя бацькі або сваякі жывуць у прыватным сектары і маюць патрэбу ў дапамозе, з’ездзіце да іх, дапамажыце па гаспадарцы, устанавіце аўтаномныя пажарныя апавяшчальнікі, праверце спраўнасць праводкі і печы! У свой час яны падарылі вам жыццё і выгадавалі. Мабыць, прыйшла пара падзякаваць іх за гэта і зрабіць усё магчымае, каб падоўжыць ім жыццё. І памятайце: правіла бумеранга ніхто не адмяняў: як вы ставіцеся да сваіх бацькоў, так і вашыя дзеці будуць ставіцца да вас!»

Рэд.