У Магілёўскай вобласці да 1 лістапада нарыхтуюць 570 тыс. кубаметраў ветравальна-бураломнай драўніны

У Магілёўскай вобласці лясгасы нарыхтуюць да 1 лістапада 570 тыс. кубаметраў ветравальна-бураломнай драўніны. Размова ідзе аб участках ляснога фонду, які пацярпеў у выніку ліпеньскай непагадзі і патрабуюць суцэльнай санітарнай рубкі, расказаў галоўны ляснічы Магілёўскага дзяржаўнага вытворчага лесагаспадарчага аб'яднання Мікалай Ляпко.

На сёння ўжо нарыхтавана 400 тыс. кубаметраў: суцэльнымі санітарнымі рубкамі пройдзена больш за 1,15 тыс. га пашкоджанага лесу, што складае каля 41 працэнта пацярпелых плошчаў. Напрыклад, у самым пацярпелым ад разгулу стыхіі Быхаўскім лясгасе на сёння нарыхтавалі 280 тыс. кубаметраў з 660 тыс. Паралельна ў лясным фондзе вядуцца работы па ўборцы захламленасці і выбарачныя санітарныя высечкі.

«У распрацоўцы ўдзельнічаюць больш за 650 чалавек - работнікаў лясгасаў вобласці і арганізацый, якія аказваюць дапамогу ў распрацоўцы на паслугах, а таксама 75 форвардэраў і 101 харвестэр - асноўная тэхніка, якая нарыхтоўвае і вывозіць драўніну, - удакладніў Мікалай Ляпко. - Дзелавая драўніна адпраўляецца на перапрацоўку як на цэхі лясгасаў, так і на буйныя прадпрыемствы канцэрна Беллеспаперапрам. Кантракты на рэалізацыю ёсць, усе аб'ёмы будуць запатрабаваны».

Увосень на бураломных лесасеках вобласці пройдуць маштабныя работы па лесааднаўленні: пасадкі будуць зроблены на плошчы каля 380 га. «У сярэднім у рэгіёне штогод аднаўляюць да 3 тыс. га лесу, а апошні буралом да гэтых аб'ёмаў дадаў яшчэ 1, 5 тыс. га, - адзначыў Мікалай Ляпко. - Да канца 2025 года ўсе бураломныя ўчасткі будуць поўнасцю адноўлены, тым больш што пасадачным матэрыялам уласнай вытворчасці рэгіён забяспечаны. На пашкоджаных лесасеках будуць створаны новыя лясы: тут з'явяцца такія пароды як хвоя, елка, дуб, алешына і бяроза».

Паводле апошніх звестак, у выніку разгулу ліпеньскай стыхіі ў Магілёўскай вобласці было пашкоджана каля 7,7 га лесу аб'ёмам прыкладна 1,1 млн кубаметраў. У тым ліку суцэльныя санітарныя рубкі неабходны на плошчы амаль 3,2 тыс. га, што складае больш за 970 тыс. кубаметраў лесу.

БЕЛТА