У Магілёўскай вобласці сёння стартавала прышчэпачная кампанія супраць грыпу. Пра гэта паведамілі ў абласным цэнтры гігіены, эпідэміялогіі і грамадскага здароўя.

Вірусы грыпу мутуюць з года ў год, таму неабходна штогадовая вакцынацыя супраць грыпу, каб прадухіліць хваробу, падкрэслілі суразмоўцы. Лепш за ўсё прышчэплівацца восенню, у верасні – лістападзе, да пачатку сезоннага ўздыму захворвання на грып і ВРВІ. На працягу 2-3 тыдняў пасля вакцынацыі сфарміруецца ахоўны ўзровень антыцелаў супраць вірусаў грыпу, які забяспечвае абарону ад захворвання на працягу 6-12 месяцаў, затым антыцелы разбураюцца.

У 2019 годзе для імунізацыі супраць грыпу будзе выкарыстоўвацца вакцына «Грыпол плюс» (Расійская Федэрацыя), «Інфлювак», (Нідэрланды), «Ваксігрып» (Францыя). Усе яны зарэгістраваны Міністэрствам аховы здароўя Беларусі, маюць вопыт прымянення не толькі ў нашай краіне, але і за мяжой.
Два з трох варыянтаў вірусаў грыпу, якія ўваходзяць у склад вакцыны ў гэтым годзе, новыя. Гэта азначае, што ў эпідэмічным сезоне 2019–2020 гадоў будуць цыркуляваць два невядомыя нашай імуннай сістэме вірусы грыпу. І гэта яшчэ адзін аргумент на карысць вакцынацыі. Мы можам з дапамогай вакцыны «пазнаёміць» наш арганізм і «падрыхтаваць» яго да сустрэчы з гэтымі новымі варыянтамі віруса грыпу.

Характарыстыка выкарыстоўваемых вакцын:

• могуць выкарыстоўвацца для вакцынацыі дзяцей з 6-месячнага ўзросту, цяжарных і ВІЧ-інфіцыраваных асоб;

• інактываваныя вакцыны не ўтрымліваюць жывых вірусаў, а толькі часткі віруса, па якіх імунная сістэма яго распазнае.

Ад’ювантная формула з поліаксідоніем ў складзе вакцыны «Грыпол плюс» дазваляе знізіць колькасць антыгенаў у тры разы, памяншае бялковую нагрузку на арганізм, узмацняе імунны адказ у імуналагічна няспелых асоб, узмацняе хуткасць развіцця і працягласць імуннага адказу, павышае бяспеку вакцыны.