У Магілёўскай вобласці ўзмоцняць кантроль за незаконнай высечкай елак

Напярэдадні святаў у Магілёўскай вобласці ўзмоцняць кантроль за незаконнай высечкай навагодніх дрэў. Пра гэта расказаў інжынер па ахове і абароне лесу ДЛГУ «Магілёўскі лясгас» Антон Асадчы.

«Напярэдадні навагодніх і калядных святаў у рэгіёне ўзмоцняць кантроль за незаконнай высечкай елак, у тым ліку ў Магілёве і Магілёўскім раёне. Цяпер нашы спецыялісты разам з іншымі адказнымі асобамі ўжо пачалі рэйдавыя праверкі, а з 23 снежня на ўсіх асноўных выездах і ўездах у Магілёў будуць працаваць мабільныя групы», – расказаў Антон Асадчы.

Першыя рэйдавыя праверкі ўжо далі свае вынікі. «Сёння ў Магілёўскім раёне было выяўлена месца незаконнай высечкі дрэў у ахоўным лесе недалёка ад населенага пункта. Там высечана каля дзясятка дрэў. Тым, хто гэта зрабіў, пагражае штраф да 50 базавых велічынь, – расказаў Антон Асадчы. – Акрамя штрафу, чалавек ці людзі, якія гэта зрабілі, будуць кампенсаваць шкоду, нанесеную навакольнаму асяроддзю: па прыблізных падліках гэта можа скласці каля Br3 тыс».

Незаконная рубка дрэў у прыродаахоўных, рэкрэацыйна-аздараўленчых і ахоўных лясах цягне накладанне штрафу. Для фізічных асоб прадугледжваецца штраф ад 5 да 50 базавых велічынь (1 БВ – Br27), для ІП – ад 20 да 200 базавых велічынь, для юрыдычнай асобы – ад 50 да 300 базавых велічынь.

Паводле слоў інжынера па ахове і абароне лесу, знаходзіць нядобрасумленных грамадзян супрацоўнікам лясгаса дапамагаюць фотапасткі. У лясах Магілёўскай вобласці іх зараз 120. «Гэта спецыяльныя камеры з фота- і відэафіксацыяй, якія рэагуюць на рух. Малюнак, які зафіксавала камера, можа прыходзіць адразу на тэлефон або планшэт, што дапамагае аператыўна ўстанавіць парушальніка. Гэта тычыцца не толькі незаконнай высечкі дрэў: так мы ўстанаўліваем асоб, якія робяць несанкцыянаваныя звалкі або парушаюць забарону на наведванне лесу», – расказаў ён.

«Апошнім часам людзі сталі больш свядомымі. Цяпер толькі адзінкавыя выпадкі, калі чалавек высякае для сябе ялінку. Танней і прасцей набыць навагодняе дрэва на спецыялізаваным рынку. Цэны даступныя, месцы продажаў ёсць у розных частках горада. Можна набыць як ужо высечаныя дрэвы, так і ў гаршчках і кадках. Потым гэта дрэва можна высадзіць на сваім участку ці ў лесе», – расказаў Антон Асадчы.

БЕЛТА