У Магілёўскай вобласці за выпальванне сухой расліннасці да адміністрацыйнай адказнасці прыцягнута 650 чалавек

У Магілёўскай вобласці ажыццяўляецца комплекс прэвентыўных мер па папярэджанні пажараў у экасістэмах. Так, сумесна з зацікаўленымі (РАУС, пракуратура, ЖКГ, СЭС, лясгасы, сельвыканкамы, Ахова прыроды, СМІ) праведзена больш за 1,8 тыс.рэйдаў, па выніках якіх да адміністрацыйнай адказнасці прыцягнута 650 чалавек.

Вясна ў гэтым годзе «пякучая» – на тэрыторыі рэгіёна адбылося 380 пажараў сухой расліннасці, плошча ўзгарання перавысіла 211 га. Дарагой цаной расплачваюцца людзі за ўласную бестурботнасць: знішчана 3 дамы і 29 гаспадарчых будынкаў, пашкоджана 17 дамоў і 33 гаспадарчыя будынкі. Загінула два чалавекі, трое атрымалі апёкі.

Для бяспечнага распальвання вогнішчаў і спальвання смецця неабходны наступныя ўмовы: зацішнае надвор’е; ёмістасць з вадой аб’ёмам не менш за 10 літраў; вычышчаная ад верхняга пласта глебы пляцоўка (шырынёй не менш за 0,25 м), адлегласць ад якой павінна быць не менш за 10 м да будынкаў, 20 м да ляснога масіва і 30 метраў да сцірты сена і саломы. Мангал або грыль бяспечна ўсталёўваць як мінімум на адлегласці 4 метраў ад дома.

Пасля спальвання на пляцоўках смецця, адходаў і прыгатавання ежы падпаленыя матэрыялы патушыце да поўнага спынення тлення.

Згодна з артыкулам 15.57 Кодэкса Рэспублікі Беларусь аб адміністрацыйных парушэннях за выпальванне сухой расліннасці, траў на корані, а таксама іржышча і пажніўных рэшткаў на палях або непрыняцце мер па ліквідацыі палаў вінаватыя асобы прыцягваюцца да адміністрацыйнай адказнасці ў выглядзе штрафу ў памеры ад дзесяці да сарака базавых велічынь. Развядзенне вогнішчаў у забароненых месцах цягне папярэджанне або накладанне штрафу ў памеры да дванаццаці базавых велічынь (арт. 58 Кодэкса Рэспублікі Беларусь аб адміністрацыйных парушэннях).

За знішчэнне альбо пашкоджанне тарфянікаў, лясных масіваў прадугледжана крымінальная адказнасць.

Будзьце вельмі асцярожныя з агнём у межах любой прыроднай тэрыторыі. Каб ваша неасцярожнасць не стала прычынай ляснога пажару, выконвайце наступныя правілы:

– ніколі не падпальваюць сухую траву на палях або палянах у лесе, пад кронамі дрэў; 

– не разводзьце вогнішча ў сухім лесе ці на тарфяніку. Вогнішча павінна быць акальцавана мінералізаванай (г. зн. вычышчанай да мінеральнага пласта глебы) паласой шырынёй не менш за 0,5 метраў;

– добра заліце вогнішча перад сыходам. Пасля гэтага разграбіце попел і пераканайцеся, што пад ім не захавалася вуглёў. Не сыходзіце ад залітага вогнішча, пакуль ад яго ідзе дым або пар;

– не пакідайце ў месцах адпачынку непатушаныя вогнішчы, запалкі, недакуркі, шкляныя бутэлькі (на сонцы яны дзейнічаюць як павелічальнае шкло, факусуюць сонечнае святло і падпальваюць траву, мох і г. д.);

– не заязджайце ў лес на аўтамабілях і асабліва на матацыклах. Іскры з глушыцеля могуць выклікаць пажар.

– не праходзьце міма падпаленай травы, пры немагчымасці патушыць пажар сваімі сіламі паведамляйце аб узгараннях у службу МНС па тэл. 101, 112. Беражыце сябе і прыроду!