У Магілёўскай вобласці з'явяцца 27 класаў інжынернай накіраванасці

У Магілёўскай вобласці з новага навучальнага года з'явяцца 27 класаў інжынернай скіраванасці. Пра гэта расказалі ў галоўным упраўленні па адукацыі Магілёўскага аблвыканкама.

«Для выяўлення і развіцця ў вучняў неабходных якасцей і ведаў, звязаных з будучай прафесійнай дзейнасцю, у навучальных установах рэгіёна пашыраецца сетка профільных класаў, - адзначылі ва ўпраўленні. - Так, у новым навучальным годзе прадоўжаць функцыянаваць профільныя класы педагагічнай, спартыўнай, аграрнай, ваенна-патрыятычнай накіраванасці. Улічваючы запатрабаванасць інжынерных прафесій на рынку працы, з 1 верасня адкрыюцца профільныя інжынерныя класы, дзе будуць рыхтаваць спецыялістаў для рэальнага сектара эканомікі. Яны з'явяцца амаль у кожным раёне вобласці».

Апорнай пляцоўкай для інжынерных класаў стане Беларуска-Расійскі ўніверсітэт. Менавіта тут для вучняў будуць арганізаваны практычныя заняткі з удзелам выкладчыкаў ВНУ. Таксама будзе наладжана зваротная сувязь - універсітэт забяспечыць школам з інжынернымі класамі адпаведную метадычную падтрымку.

Ва ўпраўленні падкрэслілі, што прафілізацыя ў старэйшай школе разам з пашырэннем сферы прымянення мэтавай падрыхтоўкі будзе садзейнічаць павелічэнню падрыхтоўкі спецыялістаў для найбольш запатрабаваных эканомікай галін. І для гэтага ва ўстановах адукацыі рэгіёну ствараецца адпаведная база. У першую чаргу працягваецца аснашчэнне ўстаноў агульнай сярэдняй адукацыі сучасным навучальным абсталяваннем.

«У мінулым навучальным годзе ажыццяўлялася цэнтралізаваная пастаўка навучальнага абсталявання і сродкаў навучання для 28 кабінетаў працоўнага навучання, 43 кабінеты біялогіі. У 28 кабінетаў прыродазнаўча-матэматычнага напрамку пастаўлены 3D-друкаркі, у 25 устаноў - камплекты робататэхнічнага абсталявання «Робба». Міністэрствам адукацыі падрыхтаваны метадычныя рэкамендацыі па яго выкарыстанні, распрацавана вучэбная праграма факультатыўных заняткаў. Таму асаблівую ўвагу трэба надаваць удасканаленню метадаў навучання і эфектыўнасці выкарыстання існуючага навучальнага абсталявання», - заключылі ў аблвыканкаме.

БЕЛТА