У Магілёўскім абласным мастацкім музеі імя П. В. Масленікава 28 кастрычніка ў 16.00 адбудзецца адкрыццё персанальнай выставы Паўла Дзімітрыядзі «Ад роднай зямлі, з роднай крыніцы». Экспазіцыя прымеркавана да 60-гадовага юбілею мастака-пейзажыста, паведамілі ва ўстанове культуры.
На выставе будзе прадстаўлена каля 30 мастацкіх твораў, створаных у розныя перыяды творчасці майстра. Работы выкананы ў розных жанрах і тэхніках, якія адкрываюць розныя грані яго творчай індывідуальнасці, пацвярджаючы высокую культуру жывапісу і бліскучы прафесіяналізм.
«Выстава – гэта справаздача аб шматгадовай і карпатлівай працы майстра, – адзначылі суразмоўцы. – Большая частка твораў адлюстроўвае непаўторную прыгажосць нашага роднага краю. Павел Дзімітрыядзі піша пейзажы з асаблівым натхненнем, ствараючы карціны, поўныя сапраўднай прасветленай любові да роднай зямлі. Таксама на экспазіцыі можна палюбавацца і паўднёвымі марскімі краявідамі, паколькі ў мастака – грэчаскія карані. Пейзаж для юбіляра – мікракосм, выражэнне сваёй філасофіі і адносін да жыцця, сувязь з духоўным светам і, вядома ж, любоў да прыгажосці нашай роднай прыроды».
Павел Дзімітрыядзі з’яўляецца ўдзельнікам шматлікіх пленэраў, якія праводзіліся ў Магілёве, Бялынічах і за мяжой, а таксама ў родным горадзе майстра – Вішове. Работы беларускага мастака выстаўляліся ў Нацыянальнай бібліятэцы Беларусі, Магілёўскім абласным мастацкім музеі імя П. В. Масленікава, у Маскве, Гродне і інш.
Рэд.
Пры выкарыстанні матэрыялаў актыўная гіперспасылка на mogilev-region.gov.by абавязковая
