У Магілёўскім раёне пачалася рэканструкцыя помніка батальёну міліцыі капітана Уладзімірава

У Магілёўскім раёне пачалася рэканструкцыя помніка байцам батальёна міліцыі капітана Уладзімірава. Аб гэтым журналістам паведаміў міністр унутраных спраў Іван Кубракоў падчас святкавання 75-годдзя Магілёўскага інстытута МУС.

«Ужо пачалася рэканструкцыя ўнікальнага помніка ў вёсцы Гаі Магілёўскага раёна. Такога мемарыяла, прысвечанага подзвігу супрацоўнікаў міліцыі ў гады Вялікай Айчыннай вайны, няма нідзе на постсавецкай прасторы, - сказаў Іван Кубракоў. - Такую памяць мы павінны захаваць. Мы шануем наш батальён Уладзімірава».

Міністр МУС адзначыў, што захаванне памяці аб подзвігу супрацоўнікаў міліцыі - гэта прыклад для тых, хто сёння вучыцца ў Магілёўскім інстытуце МУС, хто плануе паступаць у міліцэйскую ВНУ ў будучым. «Калі мы не будзем захоўваць памяць аб людзях, якія ў свой час абаранялі нашу радзіму, то ў нас не будзе будучыні», - дадаў ён.

Іван Кубракоў расказаў, што ў планах 22 красавіка правесці на памятным месцы маштабны суботнік.

БЕЛТА