У Магілёве 28 чэрвеня правядуць эстафету «Бітва двароў» сярод маладых сем’яў

У Магілёве 28 чэрвеня правядуць эстафету «Бітва двароў» сярод маладых сем’яў. Спартыўнае мерапрыемства адбудзецца ў 11.00 на спартыўнай пляцоўцы 7 корпуса МАУВА «Беларуска-Расійскі ўніверсітэт» па адрасе: г. Магілёў, вул. Ленінская, 89 б.

За перамогу паспаборнічае шэсць каманд – па тры ад Ленінскага і Кастрычніцкага раёнаў. Паколькі эстафета з’яўляецца часткай рэспубліканскага праекта «ПапаЗал», каманды будуць складацца з татаў ва ўзросце 30–42 гадоў і іх дзяцей 10–12 гадоў.

Удзельнікі прадставяць «візітныя карткі», праявяць спрыт і хуткасць у спартыўнай эстафеце. Таксама сем’і чакае конкурс капітанаў.

Пераможцаў узнагародзяць кубкам, дыпломам і каштоўным прызам – стацыянарным вулічным тэнісным сталом, які ўсталююць на дваровай тэрыторыі найлепшай каманды.

Арганізатарамі мерапрыемства выступаюць Магілёўская гарадская арганізацыя ГА «Беларускі рэспубліканскі саюз моладзі», аддзел ідэалагічнай работы і па справах моладзі Магілёўскага гарвыканкама.