У Магілёве адкрылася «Тураўская восень», прысвечаная памяці кінарэжысёра і сцэнарыста Віктара Турава

Драмы «Я родам з дзяцінства», «Вайна пад дахамі», «Сыны сыходзяць у бой», ваенная кінааповесць «Кропка адліку»... З 23 па 25 кастрычніка ўключна ў магілёўскіх кінатэатрах «Радзіма», «Чырвоная Зорка» і «Космас» пройдуць рэтраспектывы лепшых фільмаў выбітнага земляка.

Віктар Тураў нарадзіўся 25 кастрычніка 1936 г. у Магілёве. У абласным цэнтры яго імем названа вуліца. На фасадзе кінатэатра «Радзіма» ў 2003 годзе ўстаноўлена памятная дошка кінарэжысёру, сцэнарысту і народнаму артысту. З ускладання кветак да яе і пачалася сёння «Тураўская восень».

У кінамерапрыемстве ўдзельнічаюць людзі розных узростаў: ад школьнікаў да ветэранаў. У рамках «Тураўскай восені» для іх падрыхтаваны кінаэкскурс – дакументальны фільм «Віктар Тураў. Дыханне жыцця».

– Віктар Цімафеевіч стварыў шэраг выдатных карцін, экранізаваў творы беларускай і рускай класікі, яго імя ўпісана ў сусветную кінематаграфію. Мне блізкая яго творчасць, асабліва тэмы Вялікай Айчыннай вайны і беларускай вёскі. Праніклівыя, праўдзівыя, яны актуальныя і ў наш час, таму што нагадваюць усім нам і, у прыватнасці, падрастаючаму пакаленню, што мір – галоўнае на зямлі, – падкрэсліў старшыня Магілёўскага абласнога аддзялення Саюза пісьменнікаў Беларусі Аляксандр Казека, які прысутнічаў на адкрыцці «Тураўскай восені».

Кінамерапрыемства праводзіцца ў Магілёве з 2001 года і ўжо стала традыцыйным.

 СБ