У Магілёве пасля ўмяшання прафсаюза работніку даплацілі за працу ў святочныя дні

У Магілёве пасля ўмяшання прафсаюза работніку даплацілі за працу ў выходныя і святочныя дні. Пра гэта расказаў старшыня Магілёўскай абласной арганізацыі Беларускага прафсаюза работнікаў мясцовай прамысловасці і камунальна-бытавых прадпрыемстваў Павел Жуйкоў.

У прафсаюз звярнуўся былы работнік аднаго з прадпрыемстваў жыллёва-камунальнай гаспадаркі абласнога цэнтра з просьбай аб дапамозе. Па словах мужчыны, наймальнік не кампенсаваў яму працу ў святочныя і выходныя дні. Пісьмовы зварот быў сустрэты адмовай: працадаўца спаслаўся на тое, што пры падпісанні загадаў аб прыцягненні да працы ў выходныя і святочныя дні работнік абраў у якасці кампенсацыі прадастаўленне іншых неаплатных дзён адпачынку.

Разабрацца ў сітуацыі з выездам на прадпрыемства дапамагла галоўны прававы інспектар працы абласной арганізацыі галіновага прафсаюза Таццяна Судакова. Яна вывучыла прадстаўленыя наймальнікам дакументы і ўстанавіла парушэнне заканадаўства. «Артыкулам 69 Працоўнага кодэкса сапраўды прадугледжана магчымасць прадастаўлення са згоды работніка ўзамен даплаты за працу ў звышурочны час і выходныя дні іншых неаплатных дзён адпачынку. Аднак за працу ў дзяржаўныя святы і святочныя дні разлічыцца з працаўніком можна толькі даплатай», - патлумачыла яна.

У адрас кіраўніка прадпрыемства была накіравана рэкамендацыя аб аднаўленні парушаных правоў работніка. Наймальнік пагадзіўся з довадамі прафсаюзнага юрыста і зрабіў пераразлік заработнай платы з улікам індэксацыі. У выніку былому работніку прадпрыемства выплачана каля Br360.

БЕЛТА