У Магілёве замежным гасцям паказалі беларускі абрад «Гуканне вясны»

16.04.202417:10

Абрад «Гуканне вясны» прэзентавалі сёння ўдзельнікам VIII Міжнароднага форуму «Традыцыйная культура як стратэгічны рэсурс устойлівага развіцця грамадства», які праходзіць у Магілёве.

Перавесці назву гэтага прыгожага і светлага свята можна як зазыванне вясны.

- Праводзім форум раз у два гады, часам увосень, часам ранняй увесну і падбіраем якое адпавядае мерапрыемства. На гэты раз спынілі выбар на гэтым вясновым абрадзе, - распавядае дырэктар Магілёўскага абласнога метадычнага цэнтра народнай творчасці і культурна-асветнай працы Алег Хмялькоў. - Да нас прыехалі прадстаўнікі сямі краін, у тым ліку з 13 рэгіёнаў Расіі. Многія беларускія традыцыі сугучныя з расійскімі, але пры гэтым маюць шэраг унікальных рысак. Упэўнены, гасцям будзе актуальна і цікава ўбачыць «вулічны» ўрывак абраду.

Міжнародны форум - брэндавае мерапрыемства, якое ўносіць значны ўклад у развіццё культурнай прастор, адзначыў начальнік упраўлення культуры Магілёўскага аблвыканкама Аляксандр Жыгун:

- Калі дасканала і глыбока вывучаць культуру, то заўсёды знаходзіш нешта цікавае. Хочацца, каб менавіта гэтыя глыбокія і сакральныя моманты мы даведваліся і перадавалі падрастаючаму пакаленню. Аднак, калі мы хочам супрацоўнічаць з іншымі краінамі, трэба таксама ведаць і паважаць іх культуру. Тады будзе прасцей наладжваць абмен вопытам, бо культура заўсёды ідзе наперадзе: спачатку мы знаходзім пункты судакранання ў гэтай сферы, а потым ужо падключаюцца эканоміка і іншыя галіны.