У Магілёве замянілі амаль 26 км цеплавых сетак

У Магілёве да гэтага асенне-зімовага перыяду замянілі амаль 26 км цеплавых сетак. Пра гэта расказаў намеснік дырэктара - галоўны інжынер Магілёўскага гарадскога камунальнага унітарнага прадпрыемства цеплаэнергетыкі Леанід Раманенка.

«У гэтым годзе па дзяржаўнай праграме «Камфортнае жыллё і спрыяльнае асяроддзе» на 2021-2025 гады нашаму прадпрыемству было даведзена замяніць 25, 8 км цеплавых сетак. На гэты момант усе работы завершаны, - адзначыў Леанід Раманенка. - Да замены цеплавых сетак мы прыступаем адразу пасля канчатка ацяпляльнага перыяду. Каб мінімізаваць нязручнасці для гараджан і гасцей горада, усе работы праводзяцца максімальна аператыўна».

Мадэрнізацыя цеплавых сетак - неабходны працэс. За час эксплуатацыі старыя сеткі зношваюцца, што прыводзіць да прарываў і пашкоджанняў. Каб не дапусціць такіх сітуацый з прыходам халадоў і стартам ацяпляльнага сезона, цеплаэнергетыкі выкарыстоўваюць сучасныя і тэхналагічныя трубы, якія дазваляюць знізіць цеплавыя страты, маюць больш працяглы тэрмін службы. Акрамя гэтага, яны абсталяваны сістэмай аператыўнага дыстанцыйнага кантролю. Такая сістэма дазваляе вызначаць пашкоджаную ізаляцыю без правядзення раскопак.

Работнікі прадпрыемства цеплаэнергетыкі таксама займаюцца добраўпарадкаваннем тэрыторыі, якая патрапіла ў зону прац. «Усё гэта робіцца для таго, каб ствараць людзям максімальна камфортныя ўмовы для жыцця», - дадаў Леанід Раманенка.

БЕЛТА