У Мінпрацы нагадалі, хто можа атрымаць аднаразовую матэрыяльную дапамогу да новага навучальнага года

У Беларусі працягваецца прыём заяў на атрыманне матэрыяльнай дапамогі да школы. Падрабязнасці нагадалі ў прэс-службе Міністэрства працы і сацыяльнай абароны.

У міністэрстве адзначылі:

- Аднаразовая матэрыяльная дапамога прадастаўляецца сем'ям, якія выхоўваюць траіх і больш дзяцей, незалежна ад даходу сям'і. Памер выплаты на кожнае дзіця-школьніка складае 30 працэнтаў бюджэту пражытачнага мінімуму, які дзейнічае на 1 жніўня 2025 года. Звяртацца трэба ў орган па працы, занятасці і сацыяльнай абароне ў адпаведнасці з рэгістрацыяй па месцы жыхарства (месцы знаходжання) аднаго з бацькоў дзіцяці, а ў горадзе Мінску, асобных раёнах Брэсцкай, Віцебскай і Гродзенскай абласцей - па месцы вучобы дзіцяці.

У прэс-службе адзначылі, што сёлета такую дапамогу атрымаюць каля 240 тысяч школьнікаў з больш як 115 тысяч шматдзетных сем'яў.

У Мінпрацы таксама звярнулі ўвагу на тое, што малазабяспечаным сем'ям (у тым ліку шматдзетным) прадастаўляецца дзяржаўная адрасная сацыяльная дапамога:

- Памер выплат вызначаецца раённымі камісіямі ў кожным выпадку індывідуальна зыходзячы з даходу сям'і і канкрэтнай жыццёвай сітуацыі. Звяртацца трэба ў службу «Адно акно» мясцовага выканаўчага і распарадчага органа або орган па працы, занятасці і сацыяльнай абароне (тэрытарыяльны цэнтр сацыяльнага абслугоўвання насельніцтва) у адпаведнасці з рэгістрацыяй па месцы жыхарства (месцы знаходжання) аднаго з бацькоў.

Акрамя таго, работнікам, якія выхоўваюць дзяцей-школьнікаў, можа быць аказана дапамога па месцы работы бацькоў у адпаведнасці з калектыўнымі дагаворамі, лакальнымі актамі наймальніка.

У Мінпрацы і сацабароны таксама нагадалі, што ў ліпені - жніўні па ўсёй краіне праходзяць дабрачынныя акцыі, арганізаваныя ТЦСАН, фондамі і грамадскімі аб'яднаннямі: напрыклад «Школьны ранец», «Збяры дзіця ў школу», «У школу з усмешкай», «Партфель першакласніка». Па падтрымку можна звяртацца ў мясцовыя ТЦСАН, дабрачынныя арганізацыі.

 СБ