У Мсціслаўскім раёне да канца года плануюць пабудаваць самую высокую ў Беларусі ветраўстаноўку

Новая ветраэнергетычная ўстаноўка з’явіцца паблізу вёскі Асмолавічы Мсціслаўскага раёна. Пра гэта паведаміў намеснік начальніка інспекцыйна-энергетычнага аддзела Магілёўскага абласнога ўпраўлення па наглядзе за рацыянальным выкарыстаннем ПЭР Дэпартамента па энергаэфектыўнасці Дзмітрый Казакоў.

Яна будзе самай высокай у Беларусі – 142 метры, а магутнасць складзе 3,4 МВт. Пры гэтым верхняя кропка лопасці дасягне 210 метраў, а размах лопасцяў – 136 метраў. На дадзены момант самым высокім ветраком у Беларусі лічыцца электрагенератар, пабудаваны ў Навагрудскім раёне каля вёскі Вялікія Лезневічы ў 2017 годзе. Вышыня яго вежы – 117 метраў, а магутнасць 3,3 МВт.

Будаўніцтвам устаноўкі ў Мсціслаўскім раёне займаецца СТАА «ТДФ Экатэх-Магілёў». Зараз вядуцца працы па заліванні падмурка. Завяршыць яе ўзвядзенне плануюць ужо ў канцы снежня бягучага года.

Сучасная канструкцыя ВЭУ (вырабляецца спецыяльна для дадзенага праекта дацкай кампаніяй VESTAS) дазволіць выкарыстоўваць энергію ветру максімальна эфектыўна.

Дарэчы, Магілёўская вобласць займае лідзіруючыя пазіцыі па колькасці ветраэнергетычных установак (50%) і ўсталяванай магутнасці (50%) у Беларусі. Так, у краіне дзейнічае 108 ВЭУ агульнай устаноўленай электрычнай магутнасцю 120,31 МВт, з іх у нашым рэгіёне размешчана 56 установак магутнасцю 59,18 МВт.

Ред.