У падзяку за гераічнасць і Перамогу. Матэрыяльную дапамогу да 9 Мая атрымаюць 415 жыхароў Магілёва

Па ўсёй краіне пачаліся выплаты матэрыяльнай дапамогі да Дня Перамогі. У ліку першых яе атрымаў магіляўчанін, удзельнік Вялікай Айчыннай вайны Фёдар Антонавіч Пускаў.

Ветэрану споўнілася 96 гадоў. Калі пачалася вайна, у сілу ўзросту на фронт юнака не ўзялі, аднак перамога савецкага народа не засталася без яго асабістага ўкладу ў агульную справу: Фёдар Антонавіч пайшоў у партызаны, і потым ужо ў разведку. На яго стагоддзе прыпалі не толькі гады ваеннага ліхалецця, але таксама голад і разруха пасляваеннага часу. Разам з жонкай, а таксама жыхарамі вялікай савецкай краіны прайшлі праз мноства выпрабаванняў на шляху да адраджэння эканомікі і народнай гаспадаркі, радаваліся станаўленню маладой беларускай дзяржавы.

Па словах сямейнай пары, за пражытыя гады прыйшло дакладнае разуменне каштоўнасці міру, спакою і стваральнай працы, а таксама імкненне захаваць усе гэтыя дасягненні для жыцця будучых пакаленняў. «Усяго добрага - добрага здароўя і шчасця ўсім нам, - падкрэслівае ветэран. - Каб жылі мірна, і каб больш такой вайны не бачылі».

Сёння ў гасцях у ветэрана не толькі маладое пакаленне, навучэнцы сярэдняй школы №25, але і намеснік кіраўніка адміністрацыі Ленінскага раёна Магілёва Аляксей Шарай.

«Час праходзіць, і некаторыя пачынаюць ставіць пад сумнеў подзвігі і заслугі нашых дзядоў і прадзедаў, - зазначае ён. - Лічу гэта абсалютна няправільным, таму сёння ўдвая важна пачуць аб той Вялікай Перамозе менавіта з вуснаў удзельніка вайны. Тое, пра што расказваюць нашы ветэраны, каштоўна і значна для наступных пакаленняў. Гэта дазволіць пазбегнуць скажэння гістарычнага мінулага, што цягне за сабой страшныя наступствы для любога народа».

Як адзначылі ў Магілёўскім гарвыканкаме, напярэдадні 9 Мая абавязак усіх беларусаў - падзякаваць ветэранам Вялікай Айчыннай вайны за іх гераізм, уклад у Перамогу і наша мірнае неба над галавой. Таму важна горача і сардэчна павіншаваць іх з надыходзячым святам, удзяліць увагу, перадаць матэрыяльную дапамогу і ўручыць падарункі. Так, у адпаведнасці з рашэннем кіраўніка дзяржавы з 25 красавіка па 4 мая будуць ажыццяўляцца выплаты да Дня Перамогі. У Магілёве іх атрымаюць 35 ветэранаў і больш за 380 прадстаўнікоў асобных катэгорый.

БЕЛТА