У ролі добрых чараўнікоў: валанцёры з Крычава з падарункамі прыйшлі да пажылых землякоў

Новую навагоднюю традыцыю - рэспубліканскую дабрачынную акцыю «Ад усёй душы», ініцыяваную Прэзідэнтам, падтрымалі ў Крычаве. Актывісты райкама ГА «БРСМ», пераўвасобіўшыся ў казачных Дзеда Мароза і Снягурку, павіншавалі з 2023 годам і надыходзячымі Калядамі пажылых землякоў: Людмілу Лацкевіч, Марыю Раманаву і Святлану Янушкаву. Валанцёры паднеслі пенсіянерам салодкія падарункі, падарылі шмат цёплых слоў і віншаванняў, разам з імі выканалі папулярныя навагоднія мелодыі.

– Дабрачынная акцыя для пажылых людзей «Ад усёй душы» – добрая ініцыятыва, якая дазваляе праявіць клопат і ўвагу аб старэйшым пакаленні, прыцягнуць моладзь да праблем пажылых людзей, – падкрэслівае галоўны бухгалтар Крычаўскага РК ГА «БРСМ» Святлана Міхневіч. - Нашы валанцёры ўдзельнічаюць у ёй з задавальненнем, бо гэта так прыемна, бачыць радасць, усмешкі на тварах тых, да каго прыходзіш у госці. Адзінокія пенсіянеры асабліва востра адчуваюць патрэбнасць у зносінах, клопаце, таму заўсёды шчыра рады ўвазе. Людміле Васільеўне Лацкевіч 75 гадоў, яна быхаўчанка, якая шмат гадоў жыла ў Рэспубліцы Комі, дзе працавала прадаўцом. Святлана Дзмітрыеўна Янушкова, якой 82 гады, усё жыццё працавала на роднай зямлі - у саўгасе «Крычаўскі». А Марыя Фёдараўна Раманава - ёй 83 гады - у Крычаўскім гарваенкамаце. Клопат аб пажылых людзях - прыярытэт сацыяльнай палітыкі нашай дзяржавы, і мы не толькі ў святы, але і ў будні аказваем дапамогу ветэранам вайны і працы, пенсіянерам. Напрыклад, раней падключыліся да эстафеты «Дабра і цяпла»: каб зімой нашым пажылым землякам з прыватнага сектара было ўтульна, дапамагалі ім ва ўборцы і складзіраванні дроў.

Як удакладнілі ў Магілёўскім абкаме БРСМ, сёння ў рамках акцыі «Ад усёй душы» валанцёры з Бабруйскага раёна наведаюць пенсіянераў, якія самотна пражываюць, з аграгарадка Варатынь - павіншуюць, дапамогуць навесці парадак на прыдамавых тэрыторыях; актывісты БРСМ з Беларускага дзяржаўнага ўніверсітэта харчовых тэхналогій і Быхаўскага райкама БРСМ - ветэранаў Вялікай Айчыннай вайны.

СБ