І сабе, і людзям
Масавае жніво на прыватных падворках пачалося пасля таго, як да фінішнай прамой наблізілася работа ў палях. Каб разлічваць на тэхнічную дапамогу, вяскоўцам дастаткова пакінуць заяўку ў сельсавеце. Для сваіх работнікаў, а таксама ветэранаў працы ў сельгасарганізацыях прадугледжаны льготныя расцэнкі.
СКАЗАНА
- Асаблівая ўвага - пажылым і адзінокім грамадзянам, вяскоўцам. Лішкі збожжа закупяць камбінаты хлебапрадуктаў.
(Прэзідэнт Беларусі Аляксандр Лукашэнка, селектарная нарада па пытаннях уборачнай кампаніі, 21 ліпеня 2023 года).
Камбайнер Антон Пусікаў з ААТ «Палыкавічы» Магілёўскага раёна жартуе, што жніво на шасці сотках - гэта як іспыт на аўтадроме: са сваімі габарытамі тэхніка павінна ўпісацца ў невялікі ўчастак і чыста выканаць манеўр:
- Імкнуся на маленькай хуткасці ўсё захапіць да апошняга каласка, каб людзей не пакрыўдзіць. Наша гаспадарка збожжавыя ўжо сціснула, тры камбайны адправіліся дапамагаць вяскоўцам. У нас вельмі вялікая тэрыторыя: зараз прыбіраем у Новым Пашкова, за Дняпром таксама нашы вёскі. Потым паеду ў камандзіроўку дапамагаць суседняй гаспадарцы. У нашай справе на сваю і чужую не дзеляць - хлеб трэба ўбраць.
У камандзе з камбайнерам у ролі касіра эканаміст сельгаспрадпрыемства Карына Рэбека:
- Для работнікаў нашай гаспадаркі і для тых, хто працаваў у нас раней і пайшоў на пенсію, ільготныя расцэнкі. Нашы механізатары, задзейнічаныя ва ўборачнай, да зарплаты атрымліваюць яшчэ зерне. Людзі ў нас працавітыя, многія трымаюць свойскую жывёлу і птушку, таму бонус у выглядзе збожжа — добрая дапамога.
Цікавімся ў гаспадыні сціснутага ўчастку Галіны Сідоркінай, ці сапраўды выгадна вырошчваць уласныя кормы для хатняй міні-фермы.
- Лічыце самі: я за ўборку 15 сотак заплаціла каля 50 рублёў, збожжа атрымала з тузін мяшкоў. А на рынку я б толькі за адзін мех 20 рублёў заплаціла. У мяне куры, свінні: і сабе вырошчваем, і дзецям у горад. У крамах можна купіць усё, што заўгодна, а лепш вясковых яйкаў ды сала ўсё роўна нічога няма.
Сусед Васіль Алесіч загружае ўраджай у свой міні-трактар і ўступае ў дыскусію наконт таго, ці можна назваць бізнесам іх падсобныя гаспадаркі:
- Наша пакаленне проста прызвычаілася на зямлі працаваць. Вось у мяне водпуск, а я не магу нічога не рабіць.
Кіраўнік фермерскай гаспадаркі «Пралесак» Магілёўскага раёна Юры Коршунаў дапамагае вяскоўцам з навакольных вёсак са жнівом на шасці сотках бясплатна, кажа, гэта ўжо традыцыя:
- Людзі ведаюць: мы ў сябе хлеб прыбралі - і тры камбайны адпраўляюцца ў бліжэйшыя восем вёсак. Калі трэба, вылучаем салому, гной, дапамагаем пасеяць. Па-мойму, тых, хто працуе на зямлі, трэба падтрымліваць. Такія людзі - самы галоўны фактар, што вёска будзе жыць.
Так лічаць і ў Магілёўскім раённым Савеце дэпутатаў. У 2020 годзе па іх ініцыятыве была прынята праграма па падтрымцы асабістых дапаможных гаспадарак раённага маштабу. У дакуменце прадугледзелі меры стымулявання людзей, якія жадаюць зарабіць працай на сваёй зямлі: ад выдзялення дадатковых гектараў да работы нарыхтоўшчыкаў сельгаспрадукцыі. Як тлумачыць старшыня раённага Савета дэпутатаў Сяргей Ярошчанка, размова ідзе аб павышэнні дабрабыту вяскоўцаў:
- Ужо можна казаць аб першых выніках праграмы: расце колькасць тых, хто заводзіць кароў, развівае птушкагадоўлю, стварае гадавальнікі раслін. Па пытаннях уборкі збожжавых людзі могуць звярнуцца ў сельсавет, мы звязваемся з сельгасарганізацыямі і фермерамі. Расце колькасць прыватнікаў, якія аказваюць такія паслугі: іх плюс - малагабарытныя камбайны.
ФАКТ
На прыватных падворках па ўсёй рэспубліцы збожжавымі культурамі засеяна каля 30 тысяч гектараў.
СБ
