Рус Бел Eng 中文

Улада не павінна закрываць вочы на праблемы жыхароў – Леанід Заяц

Улада не павінна закрываць вочы на праблемы жыхароў вобласці. Такім меркаваннем падчас прамой тэлефоннай лініі падзяліўся старшыня Магілёўскага аблвыканкама Леанід Заяц.

«Улада не павінна закрываць вочы на праблемы жыхароў рэгіёна. 90% званкоў сёння–гэта пытанні бягучага характару. І мясцовая ўлада павінна была даўно звярнуць на іх увагу і вырашыць іх на месцах. Але пытанні засталіся нявырашанымі. У гэтым кірунку трэба правесці больш сур’ёзную працу, – адзначыў Леанід Заяц. – Поспех у вырашэнні праблем нашых жыхароў–сумесная праца кіраўнікоў адміністрацый, кіравання жыллёва-камунальнай гаспадаркі, ЖЭУ і іншых структур. Але і людзі павінны адказна ставіцца да таго, што адбываецца вакол іх. Часам можна самому скасіць каля дома траву, а не чакаць, пакуль прыйдуць іншыя і зробяць гэта. Усё, што залежыць ад выканаўчай улады, мы робім. І стараемся чалавечна і з разуменнем ставіцца да кожнага звароту».

Некалькі званкоў паступіла ад жыхароў адной з цэнтральных вуліц Магілёва. Гараджан турбуе магазін, які з нядаўняга часу пачаў працаваць кругласутачна. Паводле слоў заяўнікаў, з-за гэтага там пастаянна збіраецца шмат людзей, асабліва ў начны час. Многія паводзяць сябе неадэкватна: уключаюць гучна музыку, шумяць у дварах найбліжэйшых дамоў, ладзяць бойкі, ужываюць спіртное. Магілёўцы папрасілі звярнуць увагу на гэтую сітуацыю–гэта не толькі псуе аблічча цэнтра горада, але і перашкаджае людзям спакойна спаць па начах. Леанід Заяц узяў гэтыя звароты на кантроль і даручыў адказным структурам навесці парадак.

З розных раёнаў вобласці былі званкі, звязаныя з добраўпарадкаваннем тэрыторый, прылеглых да жылых дамоў. Жыхарку адной з вуліц Магілёва хвалюе, што не працуе вулічнае асвятленне. Жанчына падзялілася, што ў цёмны час сутак вельмі складана дабірацца дадому, асабліва ў дрэннае надвор’е. З падобнай праблемай звярнуўся і жыхар Бабруйска: ягоны дом знаходзіцца ў неасветленым тупіку вуліцы. Яшчэ адна магіляўчанка расказала, што праз даўгабуд, які хоць і абнесены плотам, складана дабірацца да дзіцячага садка. З-за зацягнутай будоўлі няма тратуараў, хадзіць даводзіцца па неўладкаванай дарожцы, якая ў дрэннае надвор’е становіцца практычна непраходнай. Старшыня аблвыканкама адзначыў, што ўсе звароты ўзяты на кантроль і ў найбліжэйшы час праблемы паспрабуюць ліквідаваць.

Некаторыя жыхары Магілёўскай вобласці паскардзіліся, што ім недаплацілі або зусім не выплацілі заработную плату. Такія звароты паступілі з Хоцімскага і Глускага раёнаў. Леанід Заяц адзначыў, што нельга так рабіць з людзьмі. Адказным структурам было даручана ў самыя кароткія тэрміны разабрацца ў існуючых сітуацыях.

Магілёвец звярнуўся да Леаніда Зайца з просьбай зрабіць прыпынак грамадскага транспарту ў адным з пасёлкаў Чавускага раёна. Мужчына расказаў, што ў вёсцы шмат людзей сталага ўзросту, а працягласць вёскі больш за 3 км, таму людзям складана дабірацца да прыпынку. Старшыня аблвыканкама запэўніў мужчыну, што да 9 жніўня ў населеным пункце зробяць прыпыначны пункт.

Усяго падчас прамой тэлефоннай лініі паступіла 30 званкоў.

БЕЛТА

Пры выкарыстанні матэрыялаў актыўная гіперспасылка на mogilev-region.gov.by абавязковая