Умовы развіцця сацыяльнай дзяржавы з улікам патрэбнасцей жыхароў рэгіёну абмеркавалі ўдзельнікі экспертнага дыялога ў Магілёве

Экспертны дыялог «Сацыяльная дзяржава: новая якасць кіравання», арганізаваны да 30-годдзя інстытута прэзідэнцтва, прайшоў 4 чэрвеня ў Магілёўскай абласной навукова-тэхнічнай бібліятэцы.

У дыялогу прынялі ўдзел прадстаўнікі рэспубліканскай, абласной і гарадской вертыкалі ўлады, БІСД, партыйныя дзеячы, эксперты Студэнцкай лігі маладых аналітыкаў, члены Магілёўскай абласной арганізацыйнай структуры РДГА «Беларускае таварыства «Веды», БРСМ і іншыя.

Удзельнікі сустрэчы абмеркавалі вынікі анлайн-апытання рэгіянальнага аддзялення БІСД, у якім удзельнічалі жыхары вобласці. Праца экспертаў была накіравана на тое, каб выпрацаваць рашэнні, якія дапамогуць палепшыць жыццё насельніцтва, абапіраючыся на тое, якія пытанні цікавяць грамадзян. «У апытанні ўдзельнічала больш за 3 тыс. чалавек з усёй вобласці. Вынікі даследавання будзем абмяркоўваць і ўзнімаць на розных узроўнях, каб меркаванне насельніцтва было пачутае. Пры гэтым апытанні праводзім рэгулярна, параўноўваем дынаміку розных гадоў. Сёння больш людзей задаволены сваім жыццём, чым летась. Бачым, што насельніцтва давольна сувяззю, адукацыяй, грамадскай бяспекай», - адзначыў начальнік Магілёўскага аддзялення Беларускага інстытута стратэгічных даследаванняў Алег Корапаў.

Так, па выніках даследавання, 87% тых, хто галасаваў у цэлым, задаволены сваім жыццём. Таксама 45% жыхароў вобласці вераць: іх жыццё найбліжэйшым часам палепшыцца. Пры гэтым галоўныя праблемы, якія хвалююць грамадзян, датычацца ўзроўню аплаты працы, росту цэн і міжнароднай абстаноўкі.

Таксама на экспертным дыялогу асобную ўвагу ўдзялілі пытанням будаўніцтва дарог, добраўпарадкавання горада і вобласці. «Сёння трэба сказаць дзякуй губернатару Анатолю Ісачанка за тое, што ўпершыню ў гісторыі рэгіёну такія вялікія фінансавыя сродкі ідуць на добраўпарадкаванне Прыдняпроўскага краю і абласнога цэнтра. Таксама захапляе, што сёння магіляўчане на чале з мэрам Аляксандрам Студневым вырашыліся на вялікі крок: «перакапаць» увесь Магілёў, каб потым насельніцтва жыло ў сучасным і камфортным горадзе», - адзначыла начальнік галоўнага ўпраўлення ідэалагічнай працы і па справах моладзі аблвыканкама Кацярына Музычэнка.

Пры гэтым спікеры ўзнялі пытанне правоў і абавязкаў маладых спецыялістаў, іх месцы ў беларускім грамадстве. Памочнік Прэзідэнта - інспектар па Магілёўскай вобласці Леанід Мартынюк падкрэсліў, што новае пакаленне мае патрэбу ў падтрымцы дзяржавы. Таленавітая моладзь павінна выказвацца і прымаць актыўны ўдзел у жыцці краіны. «Магілёўскае аддзяленне Беларускага інстытута стратэгічных даследаванняў ідзе ў авангардзе рэспублікі. Бо мы першыя паказалі, што трэба працаваць з маладымі аналітыкамі», - адзначыў ён.

У канцы дыялогу прысутныя падкрэслілі: праблемы, якія хвалююць грамадзян, будуць узнімацца на ўсіх узроўнях. «Усе задачы, якія перад намі паставілі Прэзідэнт, губернатар, мы вырашаем у адзінай камандзе. Таксама прыслухоўваемся да крытычных заўваг насельніцтва, працуем над праблемамі», – сказаў на заканчэнне старшыня Магілёўскага гарадскога Савета дэпутатаў, старшыня абласнога аддзялення партыі «Белая Русь» Максім Гурын.

 mogilevnews.by, рэд.