Урачыстым мітынгам адсвяткавалі ў Магілёве 107-ю гадавіну Кастрычніцкай рэвалюцыі

На плошчы Леніна ў Магілёве адбыўся ўрачысты мітынг, прысвечаны 107-й гадавіне Кастрычніцкай рэвалюцыі. Аддаць даніну павагі гістарычнай памяці і ўскласці кветкі да помніка сабраліся прадстаўнікі ўлады, працоўных калектываў, партый, грамадскіх аб'яднанняў, жыхары і госці горада.

Як адзначыў першы сакратар абласной арганізацыі Камуністычнай партыі Беларусі Міхаіл Жудро, 7 лістапада жыхары Беларусі адзначаюць агульнадзяржаўнае свята - Дзень Кастрычніцкай рэвалюцыі - у знак павагі да традыцый і здзяйсненняў папярэдніх пакаленняў: «Свята Вялікага Кастрычніка дапамагае лепш зразумець і ацаніць мінулае, разабрацца ў  будучыні. Гэта адзін з сімвалаў, якія аб'ядноўваюць людзей розных пакаленняў у адну нацыю. Захоўваючы гэты дзень сярод іншых памятных дат, мы тым самым аддаём даніну павагі мільёнам людзей, для якіх многія гады гэта было адно з галоўных дзяржаўных свят. З гэтай датай мы таксама звязваем шматлікія перамогі, якія і дагэтуль працягваюць заставацца прадметам нашага асаблівага гонару. Рэвалюцыя 1917 года стала адной з найзначнейшых падзей дваццатага стагоддзя і карэнным чынам паўплывала на ход далейшай гісторыі».

Ён падкрэсліў, што ў той час адбыліся змены, якія накіравалі ў патрэбнае рэчышча нашу краіну: «І зараз мы жывем у незалежнай, квітнеючай Рэспубліцы Беларусь. Самае галоўнае, што павінен разумець кожны - без ведання гісторыі няма будучыні. Наша багатая гісторыя і культура, шанаванне ветэранаў, дзякуючы якім мы жывем у незалежнай краіне, - гэта самае галоўнае, што мы перанялі і на чым грунтуецца падмурак для далейшага развіцця і будучых дасягненняў, накіраваных на ўмацаванне нашай дзяржавы, нашай незалежнай Рэспублікі Беларусь».

Сярод тых, хто сёння прыйшоў на свята - дырэктар магілёўскай СШ №5 Павел Праватораў, які распавёў, што маштаб, з якім раней адзначалі свята, з настальгіяй успамінаецца да гэтага часу: «Гэты дзень быў сапраўдным, сапраўдным святам, калі ўсе прадпрыемствы, усе установы горада выходзілі на вуліцу, збіраліся ўсе разам. Было ўрачыста, маштабна і цікава, з дэманстрацыяй, сцягамі і транспарантамі. Хацелася б вярнуць гэты размах. Каб гэтую атмасферу гонару за нашае адзінства, агульныя дасягненні розных арганізацый і прадпрыемстваў у поўнай меры адчула наша моладзь. Менавіта такія святы, акрамя станоўчых эмоцый ад зносін, давалі адчуванне, што разам мы моц і сіла».

Да размовы далучылася і яго калега Ірына Агеева, якая прыйшла на мітынг з мужам: «Усё ж прыемна, што традыцыя святкавання Дня Кастрычніцкай рэвалюцыі захоўваецца. Мы сёння з гонарам ішлі па вуліцы са сцяжкамі. Рады падзяліць свята з такімі ж аднадумцамі, якія любяць сваю краіну, ганарацца яе дасягненнямі. І прыкладаюць усе намаганні, каб з кожным днём наша краіна станавілася толькі лепшай».

Лічыць важным прывіваць дзецям любоў да радзімы магіляўчанка Святлана Бадрова: «З дачкой Рэнатай мы ходзім на ўсе святы, у тым ліку, ездзім у Александрыю. Звычайна кампанію нам яшчэ складае мая пляменніца, але сёння, нажаль, у яе не атрымалася. Імкнёмся наведваць такія мерапрыемствы, шанаваць і выконваць традыцыі. Гэта пашырае далягляд, развівае, дапамагае дзецям прасякнуцца атмасферай, зацікавіцца гісторыяй сваёй краіны і захацець пазнаць яе глыбей. Шанаваць і ганарыцца».

Студэнт 4 курса Беларуска-Расійскага ўніверсітэта Уладзіслаў Савіцкі пацвердзіў, што для моладзі ганарова працягваць добрыя традыцыі і захоўваць памяць пакаленняў: «Гэта наша мінулае і мы перакананыя, што яго нельга забываць. Гэта важна для ўсіх краін. Беларусы гэта разумеюць, як ніхто. У нас багатая гісторыя і годнае сапраўднае. Безумоўна, станоўчыя эмоцыі адчуваем і сёння, ад таго, што сабралася столькі людзей. Важна ўбачыць, як шмат у нас паспяховых прадпрыемстваў, арганізацый. І што ўсе мы разам!»

Юлія Таранава, фота Галіны Гаўрыловіч