Урачыстыя мерапрыемствы да 110-годдзя народнага мастака Беларусі Паўла Масленікава прайшлі ў Магілёве

110-гадовы юбілей народнага мастака Беларусі Паўла Масленікава адзначылі 14 лютага ў абласным цэнтры. У дзень нараджэння таленавітага жывапісца, дэкаратара, мастацтвазнаўцы і педагога ў сценах мастацкага музея, які носіць імя майстра і захоўвае мемарыяльную экспазіцыю яго карціннай галерэі, сабраліся прыхільнікі творчасці Паўла Васільевіча: супрацоўнікі музея, выкладчыкі і студэнты Магілёўскага каледжа мастацтваў і аддзялення журналістыкі МДУ імя А. А. Куляшова, а таксама родныя і блізкія мастака. У памяць пра Паўла Маленікава прысутныя ўсклалі кветкі да бронзавага бюста мастака, усталяванага ў скверы, недалёка ад уваходу ў музей. Потым сабраліся за круглым сталом у галерэі жывапісца, каб пагаварыць пра яго жыццё і творчасць.

Адразу тры пакаленні дынастыі Масленнікавых ушанавалі сваёй прысутнасцю гэты памятны дзень. Так, на сустрэчу прыехалі сын мастака Уладзімір Масленікаў - заслужаны дзеяч мастацтваў Рэспублікі Беларусь, загадчык кафедры жывапісу Беларускай дзяржаўнай акадэміі мастацтваў, прафесар, унукі: Павел Масленікаў - мастак, старшы выкладчык кафедры жывапісу Беларускай дзяржаўнай акадэміі мастацтваў, Аляксей Масленікаў і Павел Пракапцоў, праўнучка Кацярына Масленікава. Яны ўзгадвалі, якім народны мастак Беларусі быў бацькам і дзедам, якую ролю яго творчасць адыграла ў жыцці сям'і. Іх успаміны, насычаныя дэталямі з асабістага жыцця, выклікалі жывую цікавасць прысутных у зале.

Гасцямі ўрачыстасці таксама сталі старшыня Беларускага саюза мастакоў Глеб Отчык, дырэктар сталічнай гімназіі №75 імя П.У. Масленікава Васіль Ананька, а таксама вучні жывапісца. Яны ўспаміналі Паўла Васільевіча як педагога і настаўніка, які не толькі ўвёў іх у сферу мастацтва, але і навучыў заўважаць і любіць прыгожае. Расказалі пра яго ўклад у развіццё мастацкай адукацыі ў Беларусі, адзначыўшы, што менавіта дзякуючы яго ініцыятыве і намаганням у 1960-х гадах у рэспубліцы былі адкрыты новыя мастацкія спецыяльнасці і навучальныя ўстановы. Масленікаў пакінуў пасля сябе цэлую плеяду таленавітых вучняў, сярод якіх народныя і заслужаныя мастакі Беларусі Барыс Герлаван, Яўген Ждан, Вольга Дзёмкіна, Валянціна Маркавец-Бартлава, Міхаіл Раманюк і многія іншыя. Яго пераемнікі па праве лічаць Паўла Васільевіча не толькі мастацкім настаўнікам, але і чалавекам, які вучыў іх каханні да мастацтва і прыгажосці.

Кульмінацыяй святкавання стала адкрыццё выставы «Пакаленні», на якой прадстаўлены творы творчай дынастыі Масленікавых і вучняў Паўла Васільевіча, якія працягваюць справу настаўніка. Экспазіцыя дэманструе непарыўную сувязь пакаленняў мастакоў, якія ўвабралі традыцыі нацыянальнай школы жывапісу. Наведаць тэматычную выставу магіляўчане і госці горада змогуць да 29 лютага.

Валерыя Нікіціна, Аліна Кажура, МДУ ім. А.А. Куляшова, фота Галіны Гаўрыловіч