Увага дваровым тэрыторыям і асвятленню. У Магілёве актывізуюцца работы па добраўпарадкаванні

Увага дваровым тэрыторыям і асвятленню: у Магілёве з надыходам вясны актывізаваліся работы па добраўпарадкаванні тэрыторый.

Сур'ёзныя планы па добраўпарадкаванні на гэты год у Ленінскім раёне Магілёва. Як адзначыў першы намеснік кіраўніка адміністрацыі Ленінскага раёна Аляксей Шарай, Год добраўпарадкавання будзе плённым і насычаным - будуць падтрымліваць тэмпы, узятыя ў мінулым годзе.

«У 2024 годзе ў Ленінскім раёне зрабілі каля 15 дзіцячых гульнявых пляцовак, 8 – за кошт абласнога і гарадскога бюджэтаў, а 7 упершыню былі зроблены за кошт сродкаў спонсараў, прадпрыемстваў і арганізацый нашага раёна. Самая маштабная пляцоўка была адкрыта на плошчы Касманаўтаў, - распавёў ён. - У мінулым годзе мы сур'ёзна павялічылі аб'ёмы рамонту асфальтабетоннага пакрыцця дваровых тэрыторый - больш за 15 тыс. кв.м. Мы надалі ўвагу пешаходным сувязям - былі звароты ў адміністрацыю ад насельніцтва па гэтым пытанні. Вельмі вялікая ўвага была звернутая на асвятленне, перш за ўсё, дваровых тэрыторый», - падзяліўся ён вынікамі працы за 2024 год.

У гэтым годзе, у Год добраўпарадкавання, у раёне не плануюць спыняцца на дасягнутым. «У нас шмат планаў па ўладкаванні дзіцячых пляцовак, гэта актуальна. Вялікай запатрабаванасцю у грамадзян, акрамя дзіцячых гульнявых пляцовак, карыстаюцца спартыўныя пляцоўкі. Сёння дзякуючы Прэзідэнцкаму спартыўнаму клубу ёсць магчымасць размясціць у Ленінскім раёне шэраг такіх аб'ектаў. Дзве такіх пляцоўкі з'явяцца ў гэтым годзе, для іх падбіраюцца месцы, - адзначыў Аляксей Шарай. - Працягнем працаваць над фарміраваннем камфортных пешаходных сувязей. Плюс мы заходзім у рамонт фасадаў, у тым ліку цэнтральных вуліц горада. Мы таксама надамо адмысловую ўвагу кветкаваму афармленню. З прадпрыемствамі горада і Ленінскага раёна будзе праведзена праца ў частцы таго, каб яны не толькі добраўпарадкоўвалі тэрыторыю сваіх прадпрыемстваў, але і прылеглую да іх», - распавёў Аляксей Шарай.

Акрамя гэтага, актыўную работу прадоўжаць па добраўпарадкаванню парковачных месц у дварах, прывядзенні ў парадак тэрыторый гаражных кааператываў. Усяго ў раёне іх 57. Як падкрэсліў першы намеснік кіраўніка адміністрацыі Ленінскага раёна, да гэтых работ будуць прыцягваць членаў кааператываў.

Працы шмат, дзеліцца Аляксей Шарай. Усе гэтыя меры дапамогуць зрабіць жыццё гараджан яшчэ больш камфортным, а горад для гасцей і турыстаў - больш прывабным.

БЕЛТА