Уводзіны ў прафесію журналіста: новы факультатыў для школьнікаў зацвердзілі ў Беларусі

Навучальная праграма факультатыўных заняткаў «Уводзіны ў прафесію журналіста» зацверджана пастановай Міністэрства адукацыі ад 22 кастрычніка 2024 года №129. Пра гэта паведамляецца на Нацыянальным прававым інтэрнет-партале.

Факультатыў прызначаны для VIII-IX класаў устаноў адукацыі, якія рэалізуюць адукацыйныя праграмы агульнай сярэдняй адукацыі, з беларускай і рускай мовамі навучання і выхавання. Праграма накіравана на азнаямленне навучэнцаў з журналістыкай як асаблівым відам інфармацыйна-камунікацыйнай дзейнасці, аналіз яе асноўных кампанентаў, фарміраванне ўяўленняў аб практычнай дзейнасці журналіста.

Школьнікі атрымаюць уяўленне, у прыватнасці, аб базавых навыках журналіста, прафесійных і этычных прынцыпах працы ў прафесіі. Будзе ўдзелена ўвага манеры паводзінаў і знешняму выгляду прадстаўнікоў гэтай прафесійнай супольнасці. Дзеці даведаюцца і аб функцыянаванні рэдакцыі СМІ. Ім раскажуць пра асноўныя жанры журналістыкі, правы і абавязкі журналіста, спецыфіку падачы аўдыёвізуальнай і тэкставай інфармацыі і г.д.

У працэсе навучання школьнікі пазнаёмяцца з асноўнымі палажэннямі законаў аб сродках масавай інфармацыі, аб рэкламе, аб аўтарскім праве і сумежных правах, Кодэкса прафесійнай этыкі журналіста. Акрамя таго, падлеткі навучацца атрымліваць інфармацыю, праводзіць яе адбор, крытычны аналіз, правяраць дакладнасць атрыманых даных і іх крыніц, правільна і лагічна выбудоўваць журналісцкі тэкст у залежнасці ад яго жанравай прыналежнасці і мэтавай аўдыторыі, ствараць публікацыі для СМІ сваёй узроставай групы.

Прававы акт прыняты ў адпаведнасці з Кодэксам Беларусі аб адукацыі. Пастанова набывае моц з 30 кастрычніка 2024 года.

БЕЛТА