Ва ўборачнай кампаніі на Магілёўшчыне будзе задзейнічана больш за тысячу камбайнаў

Больш за тысячу камбайнаў будуць задзейнічаны падчас уборкі ўраджаю ў Магілёўскай вобласці. Аб гэтым журналістам расказаў старшыня камітэта па сельскай гаспадарцы і харчаванні Магілёўскага аблвыканкама Анатоль Ланкуць па выніках селектарнай нарады з Прэзідэнтам па пытаннях уборачнай кампаніі 2025 года.

«Аб'ёмы ўборкі ў нас у гэтым годзе складаюць 356 тыс. гектараў без уліку кукурузы. Гатоўнасць камбайнавага парку зараз складае 96%. Калі канкрэтна, засталося дапрацаваць 19-20 камбайнаў. Мы разлічваем, што ў найбліжэйшыя дні з гэтай задачай справімся. Зернесушыльныя комплексы ў вобласці таксама практычна гатовы. Засталося нам дапрацаваць тры комплексы на ўсю вобласць. У бліжэйшыя два дні мы завершым і гэтыя працы», - распавёў ён.

Паводле слоў Анатоля Ланкуця, у гэтую гарачую пару на палях рэгіёну будуць працаваць больш як 1 тыс. камбайнаў. Яшчэ больш як 70 адзінак тэхнікі плануецца набыць.

«Першыя намалоты на ўборцы азімага ячменю паказваюць, што ў цэлым ураджайнасць дзесьці на 30% вышэйшая за леташнія лічбы. І мы разлічваем, што такія ж аб'ёмы прыросту збожжавых мы захаваем і на астатніх культурах, - сказаў ён. - Сёння адзінае ўскладненне - гэта моцныя дажджы, якія стрымліваюць праходжанне ўборкі. Ёсць прынады - сцеблапад'ёмнікі, падзельнікі для таго, каб падняць хлеб, які паклалі дажджы і навальніцы. Ёсць транспарт, падабралі механізатараў. Гэта значыць вобласць да прац гатовая».

Як адзначыў старшыня камітэта, задача стаіць больш чым зразумелая - убраць ураджай без страт. «Будзем змагацца за кожнае поле, за кожны гектар і кожную сотку зямлі», - падсумаваў ён.

БЕЛТА