Вальшчыкі з лясгасаў Брэсцкай вобласці дапамагаюць ліквідаваць наступствы ўрагану ў Магілёве

Работнікі лясгасаў Брэсцкай вобласці прыехалі ў Магілёў для дапамогі ў ліквідацыі наступстваў урагану, які адбыўся з 9 на 10 ліпеня. Пра гэта паведаміў галоўны ляснічы Брэсцкага дзяржаўнага вытворчага лесагаспадарчага аб'яднання (ДВЛГА) Аляксандр Мацюшэўскі.

На дапамогу магіляўчанам з Брэсцкай вобласці прыехалі больш за 30 работнікаў лясной гаспадаркі. Дэлегавалі 13 лясгасаў паўднёва-заходняга рэгіёну 25 вальшчыкаў. Таксама камандзіраваны кіраўнік работ, інжынеры, вадзіцель. Яны акажуць садзейнічанне «Магілёўзелянбуду» і ЖРЭУ Ленінскага раёна Магілёва.

«Выехалі мы днём 20 ліпеня, увечары былі на месцы. Размясціліся, забяспечана гарачае харчаванне. Сёння раніцай арганізацыі размеркавалі нашых вальшчыкаў па месцах работ. Працуюць яны ў розных лакацыях Магілёва», - распавёў Аляксандр Мацюшэўскі. Дапамагаюць ліквідаваць наступствы ўрагану вопытныя людзі: вальшчыкі лесу і лесаводы, якія маюць стаж работы з бензапіламі не менш як тры гады. «Праца складаная, небяспечная, адказная. Гэта не ў лесе дрэвы валіць, а ў горадзе. Ёсць нюансы пры ліквідацыі наступстваў урагану. Шмат завіслых, якія не аддзяліліся зломаў», - звярнуў увагу галоўны ляснічы Брэсцкага ДВЛГА.

У Брэсцкай вобласці стыхія пакінула пасля сябе нязначную шкоду лясному фонду. «Усяго па вобласці буралому (калі не памыляюся): 7 га суцэльных санітарных высечак і 70 га ўборкі захламленасці. Брэстчыну мінула, пашкоджанняў няшмат. Мы да 1 жніўня павінны свае буралому распрацаваць, задача стаіць да гэтага часу ўсе пашкоджанні ўбраць», - падкрэсліў Аляксандр Мацюшэўскі.

БЕЛТА