Варэнне, настойкі і тарты з агурка – у Шклове смачна і хрустка прайшоў «Дзень агурка»

Агуркі маласольныя і бочковыя, варэнне, настойкі і тарты з агурка, агурочныя падворкі, нават фотазона, дзе рамка для фотасесій упрыгожана хрумсткай зялёненькай гароднінай... Раённае свята «Дзень агурка – 2023» прайшло ў Шклове.

Фестываль збору летняга ўраджаю пачаўся канцэртам «Шклоў вітае, на святы гурка запрашае!», парадаваў гастра-фестам, смачнымі тэматычнымі падворкамі, у тым ліку конкурснымі - на «самы арыгінальны агурочны падворак». Тут выбралі «Лепшую страву агурочнага свята», «Самую арыгінальную агурочную кампазіцыю», выставай-кірмашом дэкаратыўна-прыкладнога мастацтва.

Шклоў здаўна звалі агурочнай сталіцай. Паводле пісьмовых крыніц, першыя згадкі пра тое, што тут вырошчваюць найсмачную хрумсткую гародніну, датуюцца XVI стагоддзем. Першае раённае свята «Дзень агурка» ў райцэнтры арганізавалі ў 2006 годзе, а ў 2007-ым у Шклове ўстанавілі бронзавую скульптуру агурка, якая стала своеасаблівым талісманам і адной з візітных картак горада.

- Свята збору ўраджаю прываблівае не толькі гурманаў, тут заўсёды шмат музыкі і творчасці, - падкрэслівае метадыст Магілёўскага абласнога метадычнага цэнтра народнай творчасці і культурна-асветнай працы Юлія Астапкіна. - На гэты раз на базе гімназіі Шклова адбыўся конкурс вакальнага мастацтва «Зорны край», у якім бралі ўдзел творчыя калектывы і індывідуальныя выканаўцы ўстаноў раёна. Прайшоў у рамках «Дня агурка» і гала-канцэрт «Спявай, народная душа!» пры ўдзеле вакальна-інструментальнага ансамбля «Музычны партал», творчых калектываў Бялыніцкага раёна.

На фестываль летняга ўраджаю ў Шклоў з'язджаюцца госці і турысты з усёй Магілёўскай вобласці. Каб пагрузіцца ў атмасферу пацешнага свята, пакаштаваць духмяных разнасолаў, павезці з сабой добры настрой, слоічак-другі найсмачных хрумсткіх агурочкаў і парачку ўнікальных шклоўскіх рэцэптаў.

 СБ