Веды гісторыі роднага краю і выдатная фізпадрыхтоўка. У Магілёве прайшоў абласны этап ваенна-прыкладной гульні «Прарыў»

Абласны этап рэспубліканскай ваенна-прыкладной гульні аб'яднаў у Магілёве студэнтаў з чатырох ВНУ рэгіёну.

Пляцоўкай для праходжання тэматычных этапаў стала Магілёўскае абласное кадэцкае вучылішча ім. Героя Савецкага Саюза Я.Мікалаенкі. Тут сабраліся 40 студэнтаў з Беларускай дзяржаўнай сельскагаспадарчай акадэміі, Беларуска-Расійскага ўніверсітэта, Магілёўскага дзяржаўнага ўніверсітэта ім. А.А.Куляшова і Беларускага дзяржаўнага ўніверсітэта харчовых і хімічных тэхналогій.

Арганізатары падрыхтавалі для каманд насычаную і разнастайную праграму, дзе хлопцы і дзяўчаты змаглі праверыць свае інтэлектуальныя здольнасці і веды гісторыі роднага краю, разуменне бягучай сітуацыі ў свеце, фізічную падрыхтоўку і цягавітасць, трапнасць і нават пабываць у ролі аператара беспілотнага лятальнага апарата на спецыяльным сімулятары.

«Ваенна-прыкладная гульня накіравана на ўсебаковае развіццё моладзі. Удзельнікамі «Прарыву» сталі студэнты грамадзянскіх ВНУ, якія ў навучальных буднях не маюць дачынення да ваеннай кафедры. Пры гэтым хлопцы і дзяўчаты разумеюць важнасць такіх тэматычных мерапрыемстваў, бо тут спалучана выхаванне патрыятызму, атрыманне неабходных навыкаў і ведаў, як дзейнічаць у надзвычайных сітуацыях. А яшчэ - кожны грамадзянін нашай краіны павінен умець і быць гатовым пры неабходнасці стаць на абарону сваёй радзімы, - адзначыў другі сакратар Магілёўскага абкама ГА «БРСМ» Алег Бойка. - Такая ваенна-прыкладная гульня праходзіць у нашым рэгіёне ўпершыню і моладзь актыўна падтрымала гэтую ідэю. Яна працягвае цыкл мерапрыемстваў, прысвечаных 80-годдзю Перамогі савецкага народа ў Вялікай Айчыннай вайне».

Усе каманды былі зараджаны на перамогу. Як падзяліўся капітан каманды Беларуска-Расійскага ўніверсітэта Арцём Качуеў, іх каманда з вялікай цікавасцю адгукнулася на прапанову паўдзельнічаць у такой тэматычнай гульні. «Я ўпэўнены, усе маладыя людзі, якія яшчэ вучацца ва ўніверсітэтах і не служылі ў войску, павінны быць абаронцамі сваёй радзімы, сваіх блізкіх. На такіх гульнях можна атрымаць навыкі і ўменні, якія хлопцам спатрэбяцца ў будучыні, калі пойдуць у войска, - сказаў ён. - Мы сур'ёзна рыхтаваліся да інтэлектуальнага конкурсу, ва ўсіх добрая фізічная форма. У камандзе не толькі хлопцы, але і дзяўчаты. Усе зараджаны на высокія вынікі. Я, як капітан, не толькі нароўні з усімі браў удзел у конкурсных этапах, але і падтрымліваў хлопцаў, іх матывацыю і дысцыпліну».

У камандзе Беларускай дзяржаўнай сельскагаспадарчай акадэміі дзве дзяўчыны. Студэнтка першага курса факультэта механізацыі сельскай гаспадаркі Ульяна Волчанка адзначыла, што такі фармат мерапрыемстваў - вельмі цікавы, бо тут важна ўсё: веды, спрыт, трапнасць, фізпадрыхтоўка. «Наша каманда настроена на перамогу. Усе рыхтаваліся, і мы хочам даказаць, што мы найлепшыя», - падкрэсліла яна.

Другая дзяўчына ў камандзе БДСГА - другакурсніца Таццяна Шуткіна. Дзяўчына атрымлівае прафесію агранома. «Найперш у склад каманды ўвайшлі спартсмены. Я, напрыклад, займаюся лёгкай атлетыкай. Раней удзельнічала ў падобных гульнях, а таму ведала, што нас чакае, але ад гэтай цікавасці не менш», - сказала яна.

Па выніках праходжання ўсіх этапаў лепшы вынік паказала каманда БДСГА. Цяпер юнакі і дзяўчаты будуць прадстаўляць Магілёўскую вобласць у фінальным этапе рэспубліканскай ваенна-прыкладной гульні.

БЕЛТА