Велапрабег «VYTOKI-2022» на 30 і 77 км адбудзецца ў Горках

У рамках рэспубліканскага культурна-спартыўнага фестывалю «Вытокі. Крок да Алімпу», які пройдзе ў Горках 22–23 ліпеня, адбудзецца велапрабег на дзве дыстанцыі: 30 і 77 кіламетраў.

Мерапрыемства праводзіцца з мэтай прапаганды здаровага ладу жыцця, далучэння да рэгулярных заняткаў фізкультурай і спортам, прапаганды веласпорту як сродку актыўнага адпачынку і арганізацыі вольнага часу, аб’яднання людзей рознага ўзросту. Папулярызацыі г. Горкі як зручнага і даступнага месца для правядзення аматарскіх веламерапрыемстваў і актыўнага адпачынку.

Арганізатары велапрабегу: клуб «Velo-Gorki», Горацкая раённая арганізацыя РГА «Белая Русь», УА «Беларуская дзяржаўная ордэнаў Кастрычніцкай рэвалюцыі і Працоўнага Чырвонага Сцяга сельскагаспадарчая акадэмія», грамадскае аб’яднанне «Беларускі рэспубліканскі саюз моладзі» УА БДСГА.

– Трэк велапрабегу на дыстанцыю 77 км пройдзе ад Горак праз аг. Леніна, в. Стараселле, в. Ходараўка, аг. Каменка, аг. Горы, – паведаміў член арганізацыйнага камітэта Руслан Даргель. – А трэк на дыстанцыю 30 км пройдзе ад Горак да аг. Леніна і назад.

Кароткая дыстанцыя разлічана для асоб ад 14 да 17 гадоў, а доўгая для асоб старэйшых за 18 гадоў.

Старт веламарафона адбудзецца 22 ліпеня ў 12.00 ля мемарыяла «Журботная маці». Фініш – г. Горкі, мемарыял «Журботная маці».

– Анлайн рэгістрацыя ўжо ідзе, а завяршаецца яна за суткі да пачатку велапрабегу, – падкрэсліў Руслан Даргель. – Для рэгістрацыі ў веламарафоне ўдзельнікам неабходна адправіць фота запоўненай анкеты па Viber на нумар 8029 7472562. Атрымаць СМС апавяшчэнне па Viber аб выніку рэгістрацыі.

Трэк пройдзе па маляўнічых месцах Горацкага раёна. У аг. Леніна ўдзельнікі марафону змогуць наведаць унікальны музей савецка-польскай баявой садружнасці. Музей быў адкрыты 15 кастрычніка 1968 года ў гонар 25-годдзя бітвы пад Леніна Першай польскай пяхотнай дывізіі імя Т. Касцюшкі сумесна з савецкімі дывізіямі супраць нямецка-фашысцкіх захопнікаў.

Музей збудаваны па праекце маскоўскіх архітэктараў Я. Белапольскага, Хавіна, скульптура В. Цыгаля. Яго купал нагадвае салдацкую каску, якая ляжыць на зямлі.

У аг. Горы запланавана наведванне Мікольскай купелі і крыніцы. Удзельнікі не толькі змогуць выпрабаваць сябе на дыстанцыі, але і акунуцца ў святой крыніцы.

– Маршрут сапраўды цікавы, – падкрэсліў Руслан Даргель. – Кожны ўдзельнік, незалежна ад узросту, знойдзе для сябе яркія кадры, якія застануцца з ім на доўгія гады.

mogilevnews.by