Ветэранаў органаў унутраных спраў і ўнутраных войскаў ўшаноўвалі ў Магілёве

У Магілёве ўшаноўвалі ветэранаў органаў унутраных спраў і ўнутраных войскаў. Пра гэта паведамілі ва УУС Магілёўскага аблвыканкама.

Святочныя мерапрыемствы прайшлі ў абласным цэнтры 11 лістапада. На пляцоўцы перад УУС адбылася ўрачыстая цырымонія ўскладання кветак і вянкоў да памятнага знаку супрацоўнікам, якія загінулі пры выкананні воінскага і службовага абавязку. Затым начальнік УУС Магілёўскага аблвыканкама генерал-маёр міліцыі Ігар Шчарбачэня ўручыў узнагароды ветэранам.

Працягнуўся святочны дзень у Палацы культуры вобласці, дзе для ганаровых гасцей, ветэранаў і іх сем’яў падрыхтавалі вялікую канцэртную праграму. Гледачам паказалі відэафільм аб асноўных этапах станаўлення і развіцця ветэранскіх арганізацый у органах унутраных спраў Магілёўскай вобласці, людзях, якія стаялі ля вытокаў іх стварэння, і аб дзейнасці на сучасным этапе.

Ігар Шчарбачэня падзякаваў ветэранам за шматгадовую вернасць прынятай прысязе, патрыятызм і высокі прафесіяналізм. «Супрацоўнікі органаў унутраных спраў на розных этапах гісторыі беларускай міліцыі з гонарам выконвалі свой абавязак, праяўлялі сапраўдную мужнасць, а часам і гераізм. Яны і цяпер з’яўляюцца арыенцірамі для маладых міліцыянераў, – адзначыў ён. – Паважаныя ветэраны! Мы вельмі цэнім Ваш уклад у агульную справу, вашу падтрымку і вопыт, без якіх нашы поспехі па забеспячэнні міру і спакою былі б немагчымыя. Актыўная ветэранская праца станоўча ацэньваецца і падтрымліваецца як службовымі калектывамі, так і жыхарамі вобласці. А гэта значыць, што традыцыі магілёўскай міліцыі не толькі захоўваюцца, але і прымнажаюцца. Жадаю вам і вашым блізкім моцнага здароўя, доўгіх гадоў жыцця, сямейнага дабрабыту, удачы і поспехаў».

Пасля гэтага на сцэне адбылася цырымонія ўручэння ўзнагарод. Працягнулася свята яркай канцэртнай праграмай. Творчыя падарункі вартавым правапарадку падарылі артысты Магілёўскай абласной філармоніі, а таксама падпалкоўнік міліцыі Віталь Астанковіч, старшы лейтэнант міліцыі Лізавета Хальпукова, ветэран органаў унутраных спраў палкоўнік міліцыі ў адстаўцы Мікалай Самсонаў і народны вакальны ансамбль «Афіцэры» Мсціслаўскага РАУС.

БЕЛТА