Выбары-2025: аб высокай цікавасці СМІ і аб тым, хто і як зможа прагаласаваць

Выразная арганізацыя, высокая цікавасць

Каля 800 беларускіх і замежных журналістаў з больш як 70 СМІ хочуць асвятляць выбранне кіраўніка беларускай дзяржавы.

Да сённяшняга дня - 15 студзеня - кожны выбаршчык краіны (а іх, паводле звестак ЦВК, 6 900 504 чалавекі) атрымаў запрашэнне на выбары. Хто яшчэ не атрымаў - зазірніце ў свае паштовыя скрыні. У запрашэннях указаны адрас участка для галасавання і нумар тэлефона, да запрашэнняў прыкладаецца ўлётка з біяграфічнымі дадзенымі ўсіх кандыдатаў. Звесткі аб кандыдатах таксама размешчаны на сайце Цэнтральнай выбарчай камісіі Беларусі. Тым часам доўгатэрміновыя міжнародныя наглядальнікі ўжо сочаць за падрыхтоўкай да выбараў, праводзяць сустрэчы з прадстаўнікамі перадвыбарных штабоў кандыдатаў і кіраўнікамі дзяржорганаў, задзейнічаных у падрыхтоўцы электаральнай кампаніі.

Не па месцы рэгістрацыі

З 10 студзеня выбаршчыкі могуць праверыць сябе ў спісах для галасавання па месцы пражывання. Але што рабіць, калі месца пражывання выбаршчыка адрозніваецца ад месца яго рэгістрацыі?

Пры жаданні прагаласаваць не па месцы рэгістрацыі выбаршчык можа звярнуцца ва ўчастковую камісію па выбарах Прэзідэнта Рэспублікі Беларусь па месцы пражывання ў перыяд да 25 студзеня. З сабой трэба мець пашпарт (ідэнтыфікацыйную карту) і дакумент, які пацвярджае пражыванне на тэрыторыі ўчастка для галасавання (пасведчанне аб праве ўласнасці на нерухомую маёмасць, дагавор найму жылога памяшкання або іншы дакумент, які пацвярджае пражыванне).

Участковыя камісіі працуюць:

з 10 па 20 студзеня: з 17:00 да 19:00 па буднях (з 12:00 да 14:00 па суботах);

з 21 па 25 студзеня: з 12:00 да 19:00.

Беларусам замежжа

Рэалізаваць сваё канстытуцыйнае права беларусы, якія валодаюць выбарчым правам; якія пастаянна пражываюць за межамі Беларусі; якія аформілі выезд для пастаяннага пражывання за межамі Беларусі; якія знаходзяцца на консульскім уліку грамадзян Рэспублікі Беларусь; якія не маюць рэгістрацыі па месцы знаходжання на тэрыторыі Беларусі, змогуць на ўчастках для галасавання:

г. Брэст, вул. Карла Маркса, д. 19, Брэсцкае абласное аб'яднанне прафсаюзаў - участак для галасавання № 24;

г. Віцебск, вул. Маякоўскага, д. 1, ДУ «Цэнтр культуры «Віцебск» – участак для галасавання № 15;

г. Гомель, вул. Ланге, д. 17, ДУ «Гомельскі абласны грамадска-культурны цэнтр» - участак для галасавання № 74;

г. Гродна, вул. Ажэшкі, д. 22, УА «Гродзенскі дзяржаўны ўніверсітэт імя Янкі Купалы» - участак для галасавання № 14;

г. Мінск, вул. Свярдлова, д. 30, ДУА «Гімназія № 75 г. Мінска імя П. В. Масленікава» - участак для галасавання № 61;

г. Магілёў, вул. Бярозаўская, д. 1, ДУА «Сярэдняя школа № 24 г. Магілёва імя К. М. Сіманава» - участак для галасавання № 84.

Бюлетэнь для галасавання будзе выдавацца такім грамадзянам пры прад'яўленні імі пашпарта, ідэнтыфікацыйнай карты, біяметрычнага пашпарта грамадзяніна Беларусі.

Тым, хто галасуе ўпершыню

У выбарах Прэзідэнта Беларусі прымуць удзел больш за 88 тысяч грамадзян, якія ўпершыню галасуюць. Гэта юнакі і дзяўчаты, якім споўнілася 18 гадоў у перыяд з 26 лютага 2024 года па 26 студзеня 2025 года ўключна. Для віншавання ўпершыню галасуючых Цэнтральнай выбарчай камісіяй сумесна з Міністэрствам інфармацыі і выдавецтвам «Беларусь» падрыхтавана падарункавае выданне «Сімвалы суверэннай Беларусі». Яго аўтарам і складальнікам выступіў беларускі палітолаг Сяргей Мусіенка, у падрыхтоўцы выдання таксама прынялі ўдзел Ігар Марзалюк, Фёдар Поўны, Міхаіл Баразна і іншыя вядомыя людзі краіны. У інтэрв'ю БЕЛТА Сяргей Мусіенка заўважыў:

- Кожны час прыўносіць свае сімвалы. І, на мой погляд, тая дзяржава жыве і развіваецца, якая стварае сімвалы. Размова ў кнізе не пра мінулае, а пра нашу сучаснасць і будучыню. Калі мы дазваляем камусьці перапісваць гісторыю і знішчаць нашы сімвалы, дык гэта адразу нам і прысуд! На старонках кнігі мы пастараліся пра гэта расказаць. Ёсць сімвалы, якія нам дасталіся ад продкаў, ад савецкага часу, - Хатынь, Курган Славы. Але разам з тым за апошнія дзесяцігоддзі ўзніклі Ола, Чырвоны Бераг — сімвалы нязломнай стойкасці нашага народа, на якіх мы вучым дзяцей. Ёсць аб'яднальны сімвал «Кветкі Вялікай Перамогі», які ўзнік таксама ў наш час.

Беспрэцэдэнтна высокая цікавасць

Вядучыя нацыянальныя і сусветныя медыя праяўляюць беспрэцэдэнтна высокую цікавасць да выбараў Прэзідэнта Беларусі, паведаміў кіраўнік Інфармацыйнага цэнтра ЦВК, першы намеснік міністра інфармацыі Андрэй Кунцэвіч:

- Міністэрства інфармацыі Беларусі завяршыла прыём заявак на акрэдытацыю журналістаў для працы ў Інфармацыйным цэнтры Цэнтральнай выбарчай камісіі, які з 24 па 27 студзеня разгорнецца ў Малой зале Палаца Рэспублікі. Мяркуючы па колькасці заявак, можна гаварыць аб беспрэцэдэнтна высокай цікавасці вядучых нацыянальных і сусветных медыяў да выбараў Прэзідэнта Беларусі. Аб сваім жаданні атрымаць магчымасць папрацаваць на пляцоўках Інфармацыйнага цэнтра ЦВК заявілі каля 300 журналістаў з больш чым пяці дзясяткаў замежных медыя. Таксама пададзены заяўкі на акрэдытацыю 490 прадстаўнікоў ад 26 беларускіх СМІ. Усё гэта ў сукупнасці амаль у два разы перавышае колькасць журналістаў, якія працавалі ў інфацэнтры ў папярэднюю кампанію па выбарах Кіраўніка дзяржавы.

Па словах Андрэя Кунцэвіча, упершыню Мінінфарм атрымаў запыт на доступ у інфацэнтр ад прадстаўнікоў рэгіянальных медыя і блогасферы:

- У цяперашні час усе паступілі заяўкі апрацоўваюцца. Да 22 студзеня гэты працэс будзе завершаны.

РАСЦЕ КОЛЬКАСЦЬ НАЗІРАЛЬНІКАЎ

Для назірання за выбарамі Прэзідэнта Рэспублікі Беларусь ужо акрэдытаваны 403 замежныя (міжнародныя) наглядальнікі. Прадстаўніцтва краін складае больш за 40, з іх каля 15 еўрапейскіх дзяржаў, краіны Афрыканскага кантынента, Азіі, Лацінскай Амерыкі і прасторы СНД. Тэрытарыяльнымі камісіямі па выбарах Прэзідэнта Рэспублікі Беларусь акрэдытавана 37 753 нацыянальныя наглядальнікі.

МІСІЯ ВЫКАННАЯ

14 студзеня прайшла рабочая сустрэча першага намесніка міністра ўнутраных спраў Юрыя Назаранкі з дэлегацыяй штаба Місіі назіральнікаў ад СНД на чале з яго кіраўніком Леанідам Анфімавым. Першы намеснік міністра расказаў аб аснашчэнні кожнага выбарчага ўчастка сістэмай відэаназірання, а таксама падкрэсліў, што пры ўзнікненні няштатных сітуацый будуць задзейнічаны мабільныя і групы хуткага рэагавання:

- Прыняты ўсе меры па забеспячэнні бяспекі, зроблены разлік сіл і сродкаў, адбыліся маштабныя камандна-штабныя трэніроўкі, заняткі. Асабісты састаў гатовы да выканання задач.

Па словах Леаніда Анфімава, цяперашняя Місія назіральнікаў ад СНД стала 13-й па ліку ў нашай краіне і 130-й - на тэрыторыі Садружнасці:

— За ўвесь час працы місіі ў Беларусі ў нас не было сур'ёзных нараканняў і заўваг наконт парушэнняў унутранага заканадаўства, якое рэгулюе выбары, а таксама міжнародных нормаў і правілаў.

СБ